Lafaek News—Mane Baucau-oan ida ho nia postura isin metan midar ho hamnasa midar, loron loron sempre kaer sigaru iha liman hamriik iha dalan ninin Lecidere Dili hodi faan sigaru kasa osan rahun atu bele tulun nia hala’o nia vizaun moris ba futuru nian.
Mane metan midar ne’e ho naran Joanico António Lourenço hosi munisípiu Baucau, fahe tempu balansu dader ba kursu no loraik faan sigaru iha Lecidere atu bele hetan osan bele sustenta moris loro-loron hodi kontinua tuir formasaun Lian Korea tuir nia mehi hakarak servisu iha rai-liur.
Maski moris iha limitasaun ekonomia no hasoru difikuldade, xave liberta an mak kontinua luta iha dalan-ninin atu sustenta moris no ajuda mos família, ho determinasaun ne’ebé forte, nia kontinua servisu maka’as tanba iha mehi boot atu loron ida bele buka oportunidade servisu no hadi’a nia futuru iha nasaun seluk.
“Ha’u la sente mo’e atu faan iha dalan ibun tanba servisu ida ne’e mak ajuda ha’u sustenta moris no ajuda ha’u nia nesecidade loron-loron,” Joanico António Lourenço ba Lafaek News iha Lecidere, 08/06/2026.
Joven ne’e haktuir katak servisu ne’ebé nia halo la’ós buat ne’ebé tenke sente mo’e, maibé sai hanesan oportunidade ida atu bele hetan osan no asegura nesesidade báziku ba nia an no família, maski rendimentu la boot, maibe agradese tanba loro-loron bele hetan osan husi fa’an sigaru no pulsa atu responde ba moris.
Nia esplika katak osan ne’ebé hetan husi atividade faan dala ruma la sufisiente, maibé nafatin fó benefísiu atu bele kontinua sustenta moris no responde ba nesesidade importante sira.
“Ha’u iha mehi atu loron ida bele servisu iha rai seluk no hadi’a liu tan ha’u nia futuru,” António dehan.
Saida mak mane Baucau-oan ne’e halo da-daun hanesan etapa ida atu prepara-an ba oportunidade ne’ebé di’ak liu iha futuru, inklui possibilidade atu servisu iha nasaun seluk.
“Ha’u hakarak hatudu ba juventude sira seluk katak la iha buat ida ne’ebé la bele alkansa se ita servisu maka’as no la entrega-an ba difikuldade.”
Istória jovem ne’e reflete realidade juventude barak ne’ebé kontinua luta atu supera limitasaun ekonomia ho perseveransa, dissiplina no esperansa ba futuru di’ak liu, nia prova katak servisu maka’as no determinasaun bele sai dalan importante ida hodi alkansa mehi sira. Nia espera katak loron ida nia esforsu hotu sei lori nia ba oportunidade ne’ebé boot liu no realiza nia objetivu atu moris di’ak liu iha rai seluk.
Jornalista : Rojita M.da Silva/Marcos X. de Brito
