Lafaek News–Prezidente Repúblikaa (PR) Francisco Guterress Lú Olo, louva servisu Polísia Nasional Timor Leste (PNTL) ne’ebé hatudu integgridade patriotizmu baa nasaun Timor Leste.
Iha loron festa ida-ne’e, ha’u hakarak hato’o ba Polísia Nasionál Timor-Leste, nu’udar Prezidente no sidadaun, ha’u-nia agradesimentu kle’an ba serbisu ne’ebé nia halo ona ba País hodi hatudu dedikasaun, kompeténsia no patriotizmu, serbisu polísia nian hanesan serbisu ida ne’ebé ho desgaste boot no risku permanente”, dehan Presidente Repúblika Francisco Guterres Lú Olo iha nia diskursu ba loron aniversáriu PNTL nia ba dala 22 iha sentru Formasaun Polísia Comoro Domingo 27/03/2022.
Lú Olo afirma ho laran-ksolok tebes fó sasin no fó-hanoin hikas kona-ba polísia nia kontribuisaun loro-loron ba kazu públiku atu nune’e Timor-Leste bele sai lolos duni estadu direitu demokrátiku.
Seguransa hanesan asuntu estadu nian laiha seguransa mak laiha dezenvolvimentu, laiha seguransa mak laiha Demokrasia,’’ sublina nia
Lú Olo reafirma, direitu ba liberdade no direitu ba seguransa hanesan direitu fundamentál sidadaun sira-nian ne’ebé hatuur iha konstituisaun no estadu iha obrigasaun atu promove no asegura, maibé knaar ida-ne’e la’ós estadu mesak mak tenke kaer, ne’e mós devér sidadaun hotu nian.
Hodi hatán ba dezafius seguransa ohin loron nian, ita tenke haburas polítika seguransa solidária ida ne’ebé kahur profisionalizmu no efikásia boot hasoru kriminalidade, hamutuk ho kapasidade atu mobiliza sidadaun sira ho sira-nia asosiasaun sívika sira atu hapara no prevene krime no garante orden no hakmatek ba ema hotu”, PR Lú Olo hatete.
Jornalista : Rita Moniz
Editor : Agapito de Deus
