Lafaek News— Xefe Estadu Maior Jeneral FALINTIL-Forsa Defesa Timor-Leste (F-FDTL), Majór Jeneral, Lere Anan Timur, afirma nia parte la fi’ar Ministériu Defeza (MD) atu fó osan ba barak ba instituisaun F-FDTL, maibé orden prontu ezekuta.
“Ami iha ne’e hein de’it defeza fó osan ami ezekuta, defeza fó ituan pasiensia ami simu de’it, sira fó barak ha’u lafiar, ha’u kuaze tinan rua-nulun ona la fó tuir ami nia hakarak, maibé sempre tuir sira nia hakarak,” dehan Lere ba jornalista sira iha palasiu prezidensial Bairru-Pite, Dili kuarta, (10/02/2021).
Lider forsas armadas ne’e hato’o nia ezemplu, Ministériu Defeza la uza hanoin rasik, maibé uza fali F-FDTL nia hanoin ne’e konsidera la di’ak.
“Ezemplu Ministériu Defeza lori ami nia hanoin mós hanesan sira nia hanoin ida ne’e, ne’e maka ladi’ak ami lakohi karreta sira hakarak karreta ne’e sira sosa kedas ne’e maka la di’ak,” tenik nia.
Lere esplika, Ministru Defeza atual koñese Forsas Armadas ne’e husi fuuk to’o ain kukun, no nia koñese mo-mós, “ha’u la relata mós nia rezolve problema ona” maibé hotu-hotu husi lei, buat sira ne’e hakarak ko’alia kona-ba aprovasionamentu ba meius materiais kilat, kilat musan kareta no farda buat sira ne’e hotu razaun ba kombate.
Majór Jeneral ne’e argumenta, iha instituisaun F-FDTL nia laran iha kilat ilegal mós iha, maibé laiha lista ba sosa kilat dala ruma iha Timor maka liu husi tenderizasaun kompañia manan maka sosa kilat.
“Kuandu ita sosa kilat ema sempre fó rezerva, ami Iliomar nia lian makasa’e dehan saugati fó ida ka rua saugati de’it, ne’e akontese ona iha instituisaun laran kilat ilegal mós iha, ami mak kaer duni, maibé laiha lista ami sosa kilat,” Lere hakotu.
Jornalista : Sonia de Almeida
Asisten Editór : Pedro de Almeida
