Lafaek News—Xefe Estadu Maior General F-FDTL, Tenente Jenerál Lere Anan Timur informa, planu ba komemorasaun loron FALINTIL 20 de Agostu sei realiza iha munisípiu Ainaro, eventu ne’e ho tema “tour Falintil dalan ba dame”.
“Eventu ne’e ami kalkula loron 20 Agostu, monu ba munisipiu ne’ebé ami atu too ne’e, loron 19 kalan toba iha ne’eba, dadeer realiza eventu ne’e, ami kalkula dala ruma Ainaru, tan Ainaru ita nunka halo eventu iha ne’eba, tanba mate-restus sira iha ne’eba mós ita bele dehan armazen nakonu,” hatete Xefe Estadu Maior Jenerál Falintil-FDTL, Tenente Jenerál Lere Anan Timur, hafoin enkontru semanal ho xefe estadu, Francisco Guterres Lú Olo, iha Palasiu prezidensiál Bairru-Pité, kuarta (28/07/2021).
Lider forsas armadas ne’e afirma komemorasaun loron 20 Agostu ne’e foin planu, maibé klaru katak tenke realiza duni iha munisípiu la’ós iha Dili.
“Ha’u iha planu sei provizóriu hela, ami nia planu ne’e atu komemora 20 de Agustu iha munisípiu la’ós iha Dili, ami iha eventu ida hanesan uluk halo ne’e, eventu ne’e dehan katak tour Falintil dalan ba dame,” hatete Lere.
Nune’e mós Lere esplika, hala’o eventu ida ne’e iha munisípiu atu hanoin hikas fali istória uluk hanesan iha funu laran Timor ho Timor oho malu, Fretilin ho UDT oho malu, entaun F-FDTL hakarak haleu Timor ne’e, identifika fatin sira tau estaka atu aban bainrua polítika sira ba fó kontinuidade.
“Ami naran fó atensaun ba sira, fatin ida ne’e uluk Fretilin, Fretilin oho malu, UDT ho Fretilin oho malu sein dúvida ké ita seidauk tur hamutuk dame, Fretilin too agora seidauk halo deklarasun ida ne’ebé mak fórmalmente, ba Vitima sira ne’ebé mak uluk Fretilin sira oho, balu mate inosente,” Xefe estadu esplika.
Xefe estadu informa, maske iha situasaun pandemia Covid-19 no atu realiza atividade ne’e depende ba governu nia desizaun, tanba iha komfinamentu obrigatóriu, maibé nafatin kumpre.
Jornalista : Rita Moniz
Asisten Editór : Pedro de Almeida
