Lafaek News—Asesu ba subsídiu inválides autoridade lokál iha obrigasaun atu rekoilla dadus defisiénsia hodi hato’o ba Diresaun Nasionál Protesaun Direitu Pesoal Portadores Defisiénsia atu bele hetan asisténsia.
Tuir Diretór Nasionál Protesaun Direitu Pessoal Portadores Defisiénsia (DNPDPD), Mateus da Silva, infórma atu asesu ba iha subsídiu inválides ne’e presija kompleta dokumentus, prienxe kriteira no idade tenke to’o 18 ba leten.
“Sira tenke iha kartaun eleitoral, sira tenke iha atestadu médiku hosi dotór sira katak tebes duni sira inkpasidade de traballu, idade ne’e tenke to’o duni 18 ba leten, agora idade 17 mai kraik responsabilidade inan-aman nian,” dehan Diretór DNPDPD Mateus da Silva ba lafaek news iha nia knaar fatin Ministériu Solidariedade Sosial no Inkluszun, Kaikoli, kuarta (28/07/2021).
Nia esplika, difisiénsia hirak ne’ebé tinan seidauk to’o ka la prienxe kriteiru maka autoridade lokál no inan-aman sira tenke halo proposta no kolabora ho sentru solidariedade sosiál postu atu bele hato’o ba diresaun nune’e bele hetan netik tulun.
“Difisiente sira ne’e ita bele fó apoiu maibé la hatene ema ne’e hela iha ne’ebé, entaun autoridade lokál sira maka tenke halo proposta ruma mai maka ami ba halo asesmentu hodi hare’e kondisaun moris,” tenik nia.
Entretantu subsídiu ba inválides tuir dadus ne’ebé diresaun Nasionál Protesaun Direitu Pessoal Portadores Defisiénsia hetan husi Institutu Seguransa Sosiál hamutuk ema rihun 8470 maka hetan oan subsídiu inválides inklui apoiu ai-han no materiál sira seluk.
Nune’e nia husu ba autoridade lokál sira atu kolabora ho parte Diresaun Nasionál Protesaun Direitu Pesoal Portadores Defisiénsia ka liu husi sentru solidariedade sosial munisípiu sira atu bele hato’o populasaun ne’ebé defisiénsia.
Jornalista : Pedro de Almeida
Assistente Editór : Felisberto Fernandes
