Lafaek News—Durante Timor-Leste Ukun a’an to’o ohin loron seidauk estabelese postu saúde iha suku Uabubo tan ne’e xefe Suku Uabubo, Joanico Maria Alves da Crus, oferese uma ba pesoal saúde sira hodi halo tratamentu ba nia komunidade ne’e inklui husi suku Uagia no Ossorua.
“Postu saúde iha ha’u nia suku laran rasik mós laiha, ha’u ofrese hau nia uma hodi tau postu saúde, uluk iha dotór ida ho enfermeiru ida, maibé enfermneiru transfere mai iha baucau agora hela dotór mesak maka halo atendementu ba komunidade sira,” dehan Xefe suku Uabubo, Joanico Maria Alves da Crus, ba lafaek news iha sentru konvensoens dili, kuarta, (23/12/2020).
Nia hatutan, kondisaun fatin ladun diak no problema mós ho eletrisidade, tanba ne’e dotor hela iha sentru saúde Ossu maka ba atende komunidade sira, tanba iha suku Uabubo fatin di’ak laiha iha uma simples hodi atende komunidade sira moras, tanba atu asesu ba sentru saúde tenke la’o to’o iha postu administrativu Ossu maka bele hetan tratamentu.
“Postu saúde la’os iha ona maka ladiak no uza fali hau nia uma lae, meman laiha duni ka seidauk iha, tanba ne’e maka uainhira ami enkontru iha sentru saúde Ossu sempre ko’alia kona-ba ezistensia ita nia pesoal saúde iha suku laran, ami prontu kolabora, tanba nemak direktor sira aseita no destaka pesoal saúde sira ba iha suku Uabubo, entaun ami oferese fatin par bele halo atendementu ba komunidade sira, maibé la’os atende de’it ba suku Uabubo deit maibé atende mós komunidade husi suku Uagia no Ossorua,” nia informa.
Enkuantu nia rekomenda, governu presiza hanoin nune’e bele harii uma simples oan ida no merese duni ba médiku sira atu halo tratamentu ba komunidade husi suku Uabubo, Uagia no Ossorua.
“Ami Presiza tebes uma hodi tau material saúde nian hodi bele atende komunidade sira liu-liu iha suku Uabubo,” nia sujere.
Entertantu komunidade ne’ebé halo tratamentu iha postu saúde refere maoria husi suku Uabubo ne’ebé kompostu husi aldeia neen (6), Buanurak, Dauboruba, Laritame, Osso-Gori, Leki-buti, Uai-Lia, total populasaun hamutuk 4.000 resin, xefe familia hamutuk uma kain 7752.
Jornalista : Pedro de Almeida
Editora : Nelya Barros
