Lafaek News—Suku Hataz, postu-administrativu Atabae, Munisípiu Bobonaru, maioria moris depende ba agrikulturua iha ne’ebé udan boot mota sobu natar kuaze ho porsentu 80, tanba tarde halo barajen hodi satan inundasaun ne’ebe sulin husi kadalak nakfilak sai mota.
“Husi 2018 ate 2019, ha’u nia komunidade hasoru problema bo’ot, tanba mosu inundasaun makas mota sobu hotu natar komunidade sira nian, uma kain 180 maka asesu hela natar ne’e, maibé mota sobu hotu no sira labele halo natar tanba natar fatin sai mota,” dehan Sefe suku Hataz, Diamantinho do Santos, ba lafaek news iha CCD-Dili, kuarta (23/12).
Nia esplika, komunidade husi aldeia tolu, Aidabaleten, Boloi, Aidabasalala maka lakon sira nia natar tanba laiha barajen hodi satan netik bee ne’ebé hamosu husi kadak sulin sira ne’ebé nakfilak hanesan mota hodi sobu agrikultor sira nia natar.
“Ha’u nia komunidade suku Atas natar 100%, maibé 80 % mota sobu, hela deit 20% maka komunidade sei uza hodi halo natar, maibé so han ho udan been tanba mota iha kraik natar iha leten entaun labele uza bee mota,” nia esplika.
Tanba ne’e lider komunitariu ne’e sujere governu tenke fuan boot ba nia povu hodi tenta bei-beik tau atensaun ba agrikultór sira nia natar maibé tarde liu to’o ikus mota estragu.
“Akontese inundasaun ne’e ha’u rasik lori ekipamentus hodi satan netik maibé labele mota sobu nafatin no husu apoiu ba governu, maibé governu hare’e todan lahalimar no orsamentu lato’o atu halo barajen ba natar sira ne’e, ida ne’e maka problema boot ba ha’u nia komunidade sira hasoru,” nia fundamenta.
Autoridade ne’e husu mós Ministeriu Agrikultura Peska (MAP) atu tau interese ba povu agrikultor sira-nia natar, maibé to’o ikus parte governu hare’e katak todan atu konstrui barajen tanba presiza orsamentu boot.
Entretamtu, total populasaun husi suku Hataz kompostu husi aldeia haat, Biamaraen, Aidabaleten, Boloi, Aidabasalala, hamutuk rihun tolu atus rua (3200), moris depende ba natar.
Jornalista : Pedro de Almeida
Editora : Nelya Barros
