Lafaek News—Asosiasaun Feto nia Asaun ba Desenvolvimentu Aileu (FADA) fasilita formasaun ba Foinsáe Feto no Mane hodi hasa’e partisipasaun juventude kona-ba Saúde Seksuál Reprodutivu hodi hadook an husi problema isin rua sedu no kaben sedu.
Project manajer Asosiasaun FADA Agustinha Gomes Madeira iha Konferénsia hateten, joven agora hakarak kaben sedu, tanba ne’e sira halo formasaun ba joven sira oinsá bele hadook aan husi kaben sedu.
“Formasaun ne’e oinsá atu hasae kunesemento no partisipasaun juventude sira nian kona-ba saúde seksuál reprodutivu hodi hadook an husi isin rua sedu ou problema kaben sedu,” dehan projek manager asosiasaun FADA ne’e ba jornalista iha salaun parokia Imaculada Korasaun Maubisse, Ainaro sesta semana ne’e.
Nune’e mos Presidente Konsellu Imprensa (KI) Virgílio da Silva Guterres relata, nia parte husu ba juventude feto no mane sira oinsá atu utiliza media sosiál ne’e hanesan fontes ne’ebé atu hetan informasaun lo-loos hodi kontribui ba sira nia dezenvolvimentu pesoal.
“Foinsáe sira tenke iha kapasidade atu halo selesaun ba informasaun ne’ebe iha media sosiál tanba iha media sosiál ita asesu bele fo influensia la diak ba ita no ikus mai influénsia ne’e bele desvia ita nia planu ba iha ita nia moris,” dehan Virgílio.
Konferénsia ida ne’e halao iha salaun Paroquia Imakula Corasaun Posto administrativu maubisse, no marka prejensa másimu kompostu juventude feto no mane hamutuk ema na’in 50, inklui autoridade postu no suku no linas sektorais sira.
Formasaun ne’e hala’o husi Asosiasaun FADA servisu hamututk ho Fundasaun MAHARU Maubisse ho fundasaun NAFOFILA no hetan apoiu hosi NGO Plan internasional hala’o Konferensia ba juventude feto no mane sira iha postu administrativu Maubisse munisípiu Ainaru.
Kontribuitór : Nahack Ulu
Editora : Nelya Barros
