Ermera (Lafaek News)-Kuaze semana ida ona komunidade Ermera tur iha nakukun laran tanba ahi eletrisidade mate desde kinta (01/04/2021) kalan to’o agora seidauk lakan.
“Eletrisidade mate dezde kinta kalan ne’e mai to’o agora seidauk lakan entaun kalan-kalan ami tur de’it iha nakukun laran,” informa komunidade Martinho Lemos ba Lafaek News iha Kapitál Gleno-Ermera, Tersa (06/04/2021).
Nia dehan, situasaun ne’ebé akontese hodi fó impaktu ba liña eletrisidade mate ne’e ema hotu kompriende, maibé ba ekipa relevante sira mós iha obrigasaun atu bele normaliza fila fali tanba impaktu husi eletrisidade mate estraga ema nia ekipamentu barak.
Nia afirma, bainhira eletrisidade mate estraga hotu ema nia sasán eletróniku sira, susar liután ba komunidade sira ne’ebé halo negósiu, tanba na’an, sosis no sasán sira ne’ebé presiza konzeladór sai at no dois hotu.
Nia informa, tanba ne’e husu ba ekipa EDTL autoridade munisípiu Ermera atu bele rezolve lalais problema eletrisidade, atu nune’e bele fornese liña eletrisidade ba komunidade sira iha ermera, tanba daudaun ne’e, iha Ermera laran tomak ahi mate hotu kedan.
Enkuantu komunidade Joanico Soares, argumenta tan katak, kuaze semana ida ona eletrisidade mate, tanba ne’e durante iha tempu paskua mós komunidade Ermera selebra de’it iha nakukun laran.
“Ahi mate desde kinta kalan ne’e to’o agora, entaun pasiénsia kalan ita tenke sunu lilin, se lae ita tur de’it iha nakukun laran,” nia afirma.
To’o notísia ne’e publika, jornalista Lafaeknews.com seidauk halo konfirmasaun ba Servisu EDTL Autoridade Munisípiu Ermera, maibé tuir públikasaun husi pájina ofisiál EDTL husu ba kliente EDTL hotu katak, dadaun ne’e ekipa tékniku EDTL, E.P. fó atensaun másimu ba fatin sira ne’ebé hetan estragus grave no ekipa sira espalha hotu iha fatin-fatin hodi halo atendimentu.
Maibé, tanba iha limitasaun rekursu, labele responde no atende hotu-hotu nia prekupasaun dala ida, maibe EDTL sei esforsu nafatin hodi fó atendimentu ba kliente sira hotu iha tempu badak.
Jornalista : Lino Aparicio
Editór : Floriano Soares
