Kovalima (Lafaek News)-Relasiona ho udan no anin boot ne’ebé hamosu inundasaun iha loron 4, fulan abril, tinan 2021, kuaze produtu lokál barak hetan estaga no dodok iha to’os laran iha Aldeia Ai-oan, Suku Lalawa, Postu Administrativu Tilomar, Munisípiu Kovalima.
Xefe Aldeia Ai-Oan, Manuel Amaral, informa, udan no anin-boot ne’ebé akontese iha aldeia Ai-oan ne’e, kuaze batar hektare-ualu (8) no modo hektare-rua (2) no pateka hektare-rua (2), no Fore tali ektare-ida (1), maka hetan estragus husi inundasaun ne’ebé mosu impaktu husi Udan no anin boot iha semana kotuk.
“Udan no anin boot iha Semana kotuk, ami-nia produtu lokál iha Aldeia Ai-oan ne’e barak maka hetan estraga husi Mota ne’ebé maka tama liu mai ami nia to’os laran, Ami nia batar hektare-ualu (8), Fore tali hektare-ida (1) no pateka hektare-rua (2) resin inklui modo hektare-rua (2) estraga hotu kedas, ” haktuir Xefe Aldeia ne’e ba jornalista sira iha Segunda foin lalais ne’e.
Xefe Aldeia ne’e hatete, tuir dadus ne’ebé afeta ba komunidade iha Aldeia Ai-Oan kuaze uma kain hamutuk 14 maka afeita ba inundasaun iha Aldeia Ai-Oan Suku Lalawa, Postu Administrativu Tilomar, Munisípiu Kovalima, nomos
ekipa tékniku husi Ministériu Agrikultura e Pesca (MAP) iha munisípiu Kovalima foti ona dadus ba akontesimentu hirak ne’e.
Ho nune’e, nia parte hanesan autoriedade lokál sente triste tanba durante ne’e komunidade sira la hetan rendimentu ne’ebé maka di’ak husi sira nia produtu lokál depois mosu tan inundasaun ne’ebé mak afeta ba produtu lokál komunidade nian estraga hotu iha to’os laran.
“Ha’u hanesan Xefe Aldeia sente triste, tanba hau-nia komunidade sira la hetan rendimentu ne’ebé maka di’ak husi sira-nia produtu lokál tanba udan estraga hotu,” dehan xefe Aldeia Ai-oan ne’e.
Enkuantu to’os na’in, Joanino Amaral, sente triste maibé nafatin simu ho konsekuénsia ba akontesimentu ne’e, no sei la halakon vontade atu nafatin servisu nu’udar ema agrikultór.
“Nu’udar to’os na’in tenke simu resiko ne’ebé ami hetan, no ami nu’udar to’os na’in labele halakon vontade atu servisu, ami nafatin servisu tanba ami-nia servisu maka halo to’os ne’e ona, la iha servisu seluk, di’ak ba ami maka servisu agrikultura ne’e,” dehan to’os na’in ne’e.
Jornalista : Tynho Gusmão
Editór : Chamot Nahac
