Lafaek News– Nu’udar ema umanu moris iha mundu ne’e hakarak buat hotu di’ak no kompletu hodi halo moris ne’e kompleta no haksolok durante jornada moris nian iha planeta dahaat ida-ne’e, maibé dalawa’in familia balun susar atu haksolok jornada ne’e tanba laiha kbiit atu sustenta hahan uma laran iha moris loro-loron.
Realidade ne’e akontese ba, Agusta Cristo de Jesus, ho idade 38 ho nia kaben Natalino Vidigal de Jesus, ho Idade 49 hela iha aldeia Beto Leste, suku Madohi, postu administrativu Dom aleixo, munisípiu Dili, ho oan iha na’in sia (9) mane(7), feto(2), susar ba sira atu sustenta uma laran no suporta oan sira ba eskola tanba de’it nesesidade uma laran la sufsiente.
Ha’u araska loos ba hahan husi dader too kalan, no-mos ha’u nia oan sira nia eskola maibe ami nain rua ha’u nia katuas oan forsa la to’o, tanba katuas oan serbisu mak suru rai-henek iha mota Komoro fa’an hodi sustenta ami nia oan sira bele eskola no sosa hahan uma laran nian, maibé ami sosa foos ne’e hakna’uk de’it, modo folin sentavus 50 ho mina dolar 1 nian, masin masako ami husu ba viziñu balun de’it, tanba rai henek ne’e ami fa’an ret ida dolar 12 di’ak ida tun ba dolar 10 de’it, dalaruma semana rua nia laran mak ema foin mai sosa ret ida tanba situasaun COVID-19 ne’e,” hateten Agusta ho halerik ba Lafaek News, iha Beto Leste foin lalais ne’e.
Kaben husi Natalino Vidigal de Jesus, ne’e esplika durante ne’e iha sira nia moris loron-loron la iha servisu seluk tan mak bele ajuda sira, garante de’it mak piñeira rai-henek ne’e mak bele sustenta nesesidade uma laran, sorte di’ak mak rai henek folin sira sosa hakna’uk netik foos lata lima ka liu, sorte aat mak semana rua nia laran mak rai henek ema la sosan entaun susar tebes ba sira atu han loron ida dala tolu hanesan ho ema sira seluk
Ha’u nia kaben servisu iha mota laran de’it iha mota laran, la iha tan serbisu seluk hodi ajuda netik ami, susar liu mak dudu oan sira ba eskola maibé kbiit la to’o so rai henek ne’e mak ami lara n metin, balun sosa ret rua ho balun sosa ret ida de’it, dalaruma semana rua nia laran mak ema la sosa entaun ami susar tebes atu hetan hahan loron ida nian, dalaruma foos, mina, masako ne’e ami husu ba viziñu sira ne’ebe hela besik ami,”dehan Agusta Cristo de Jesus.
Estajiada : Juvita Ximenes
Editór : Egidio Nono
