Lafaek News—Médiku Jerál Sentru Saúde Komoro (SSK) Milena do Rego informa, hahú husi fulan janeiru to’o jullu 2021, rejista moras Infeksaun Sistema Respiratóriu Aguda (ISPA), moras kulit, no moras Diareia, numeiru a’as iha Sentru Saúde Komoro.
“Husi fulan janeiru to’o iha jullu ne’e moras ne’ebé mak rejista a’as liu iha sentru saúde Komoro ne’e mak moras Infeksaun Sistema Respiratóriu Aguda (ISPA), moras kulit, no mós moras Diareia, kazu sira ne’e la halakon pasiente sira nia vida, no pasiente sira laos moras grave liu, tanba ne’e sira mai halo konsulta bai-bain de’it,” dehan Médiku Jerál Milena do Rego ba Lafaek News iha nia knaar fatin Sentru Saúde Komoro, Kinta (23/09/2021).
Nia informa, iha tinan ida ne’e pasiente sira ba halo tratamentu iha sentru saúde Komoro menus liu kompara ho tinan kotuk, tanba pasiente sira tauk atu ba halo tratamentu, bainhira atu ba halo tratamentu presiza swab, entaun halo pasiente sira tauk atu ba halo tratamentu.
”Pasiente sira ne’ebé mak ho moras ISPA, moras kulit no moras Diareia mai halo tratamentu iha ne’e ho númeru ne’ebé aas maibé ami nia ai moruk ba pasiente sira sufisiente hela hodi atende sira, pasiente ne’ebé mak mai ho kondisaun la dun di’ak ka kondisaun ne’ebé mak presiza duni ba iha emerjénsia ne’e ami langsun haruka ba kedas iha sala emerjensia,” dehan nia
Nia akresenta, iha sentru saúde ne’e tuir lolos pasiente sira ho moras ISPA nee ami tenki halo swab hotu kedas, maibé tanba deit pasiente sira tauk, entaun sira mai halo tratamentu iha nee ami presiza husu ida ne’ebé mak hakarak swab mak hafoin ami halo swab ba sira, no ida ne’ebé la kohi swap ami la bele obriga sira, maibé iha kazu emerjensia ka Maternidade nian ne’e tenki swab, nune’e swab ne’ebé mak sentru saúde Komoro uza iha modelu rua (2); swab antigen no swab PCR, ba swab Antigen bele rona kedas rezultadu iha minutu 10-15, no swab PCR nee liu tiha oras 24 mak bele rona nia rezultadu.
Enkuantu moras Infeksaun Sistema Respiratoriu Aguda (ISPA) husi janeiru to’o iha jullu hamutuk 23.788,(49.09%), moras kulit hamutuk 7063,(14.57%), no mós moras Diareia hamutuk 5950, (12.28%). Neduni kona-ba fasilidade, ai-moruk no rekursu Humanu iha sentru saúde Komoro ba dadaun ne’e sei sufisiénte hela.
Jornalista : Sandi Belo
Editora : Juvita dos Santos
