Lafaek News—Ema hotu hakarak hela iha uma ne’ebé dignu no seguru hodi satan udan, loron matan no anin fuik sira, inklui ai-han uma laran ne’ebé sufisente, maibé realidade hatudu ba familia simples Joana ho Alberto oin seluk enfernta problema oin-oin liu-liu kondisaun uma no ai-han uma laran hahu menus la-auguenta to’o semana.
Realidade moris familia Joana Maria Marçal ho idade 39 ho nia laen kaben Alberto Ximenes idade 45, iha oan nain tolu kompostu husi feto rua no mane ida ne’ebé sei tur iha banku pre-primaria no ida sedauk eskola, familia simples ne’e hela iha aldeia Beto Leste Suku Madohi Postu Administrativo Dom Aleixo Munisípiu Dilí.
Uma ne’ebé familia horik ba ho medida 5×6 iha kuartu ida kompletu ho sala vizita ne’ebé hari’i iha tinan 2009 to’o ohin loron, nune’e kalen komesa frujen ona, susar tebes atu satan natureza nia siak, dala ruma udan bo’ot bee nalihun iha laran.
Ami nia uma kondisaun ladi’ak no tempu udan be’e nalihun iha uma laran, tanba kalen sira ne’e fruzen hotu,” dehan Joana Maria Marçal ho mata ween ba jornalista Lafaek News iha nia residensia aldeia beto leste foin lalais ne’e.
Hare’e ba kuartu ne’ebé sira deskansa ba ho medida 2×3 nakonu ho ropa inklui sasan uma laran no balun tara de’it iha didin lolon tanba laiha aramriu atu rai-di’ak, husi liur hateke ba ai-rin komesa lahok ona no mós kalen ne’ebé taka iha leten mós kuat ba dadaun susar tebes atu hadia tanba osan laiha.
Kalen iha uma leten kuak hotu no ami laiha forsa atu hadia fila fali tanba osan laiha,”nia deklara.
Nia informa, servisu ne’ebé nia laen kaben durante halo maka instalasaun sasan eletroniku kada loron ida hetan $5, maibé lasufisiente atu hadi’ak uma ne’ebé kondisaun la seguru ona tanba osan hirak ne’e sosa haknaok de’it foos no mina uituan hodi han loro-loron nian, dalaruma mós sira la han tanba foos laiha.
Ha’u nia kaben lori osan mai, ha’u maka jere didi’ak atu nune’e uza to’o tempo naruk, maibé ho osan nia montante ki’ik ami lahalo buat ida hodi sosa de’it hahan, dala ruma loron ida ami la han, tanba foos sosa haknaok de’it atu sosa saka tomak osan lato’o,” hateten nia.
Observasaun jornalista lafaek news iha terrenu nota, kondisaun uma familia ne’e ladi’ak no la seguru ba familia ne’e no foos hela uituan de’it ona iha balde laran no la-auguenta ona to’o semana.
Estajiada : Libania Matos
Editór : Pedro de Almeida
