Lafaek News—Ministériu Administrasaun Estatal (MAE) liu husi nia Diresaun Programa Nasionál Dezenvolvimentu Suku (PNDS) atu halo konstrusaun uma ba kbi’it la’ek iha territóriu laran hamutuk 1272.
“Konstrusaun uma ba ita nia maluk kbi’it la’ek iha territóriu Timor-Laran tomak, ita hotu hatane katak ezeptu Dili, sei halo de’it ba iha Metinaru ho Atauro, inklui ZEEMS-RAEOA ita konstrui hotu uma kbi’it la’ek,” dehan Diretora PNDS Claudinha Soares Pinto, ba lafaek news iha nia kna’ar fatin Komera Dili, foin lalais ne’e.
Claudinha esplika, orsamentu ne’ebé aloka ba programa dezenvolvimentu nasionál suku hodi konstrui uma ba benefisiarius sira iha territóriu laran kada suku ida hetan uma tolu.
“Husi total orsamnetu ne’ebé alokadu sei konstrui uma hamutuk 1272 ba iha 424 suku, ita nia aldeia barak tebes entaun tarjetu governu nian suku iha territoriu timor laran tomak, iha aldeia ida de’it uma maka tolu, entaun husi suku hirak ne’e ita iha 225 aldeia ne’ebé maka sei halo konstrusaun uma ba kbi’it la’ek ne’e rasik,” nia esplika.
Enkuantu, kada uma ida gastu orsamentu $14 ate $17 mill ne’e fiksu ona, maibé komfome ba medida uma nian, montante orsamentu ba konstrusaun uma iha territoriu laran humutuk milloes $ 21.624, no orsamentu ne’e aloka ba iha sekratariadu PNDS nian mak sei halo transferensia ba iha suku, la’os ba iha konta bankaria xefe suku, maibé transfere ba konta bankaria PNDS nian iha suku sira, depois mak xefe xuku no estrutura PNDS no komunidade sira jere.
Entertantu Diretora reafirma, konstrusaun ne’e sei halo fazedamente, konforme komprimisu husi governu nian konklui iha tinan lima nia laran katak sei termina iha 2025, tuir total aldeia ne’ebé maka iha, ate konklui uma no entrega ba benefisiariu sira.
Jornalista : Pedro de Almeida
Editora : Nelya Barros
