Lafaek news—Aman faluk Vicente da costa Belo, idade 90, suku Bidau, postu administrativu Kristu-Rei, munisípiu Dili, loro-loron la tauur hakmatek, dadeer madrugada hadeer ona husi toba fatin hodi la’o ba Estrada ninin buka lata halibur hodi tuku belar lori ba tetu atu hetan osan sustenta nia nesesidade uma laran ba moris naruk.
Tuir lo-loos, ema ne’ebé ho idade 90, la merese ona atu buka moris, maibé situasaun ekonomia obriga pasiénsia tenke halo buat ruma oinsá bele hetan osan sosa netik foos saka ida ho mina litru ida sustenta moris.
Maibé situasaun ekonomia obriga aman faluk Vicente iha ne’ebé idade avansadu liu ona, la’o haleu sidade Dili, husi Bidau too suku Komoro tui-tuir Estrada ninin hateke no fihir ba valeta no sukit lixu sira ne’ebé bou an hodi buka lata mamuk hanesan Fanta, serveza no lata spirite mamuk.
“Durante ne’e ha’u hili deit lata, no lata ne’ebé mak ha’u hili lori mai uma ha’u tuku tiha hafoin ema mai tetu osan iha ha’u sosa hahan uma laran hodi han,” dehan avó Vicente ba lafaek news iha nia uma Biadau, kuarta semana ne’e.
Vicente konta katak, hili lata mamuk ne’e la’os foin agora, maibé dezde tempu Indonézia too ohin loron kontinua hili nafatin lata mamuk hodi sustenta ezijénsia nesesidade iha uma laran.
“Ha’u hili lata ne’e la’os agora mak hili, maibé ha’u hili lata hahu husi Indonesia nia tempo too de’it agora mak hili lata hodi sustenta ha’u nia moris, Ha’u sai husi uma bidau tuku tolu magrugada ha’u ba hili lata iha kristu rei too tuku sia fila mai uma han tiha hafoin ha’u ba fali hili lata iha komoro too tuku hitu kalan mak ha’u fila mai uma “,dehan nia
Bainhira dada lia kuaze oras ida ho avó Vicente, hodi dehan nia iha oan hamutuk nain rua iha feto ida no mane ida no agora da-daun sira forma familia hotu ona hela iha ida-idak nia uma la hamutuk ho avó Vicente.
” Ha’u nia oan nain rua iha feto ida no mane ida no agora sira nain rua forma familia hotu ona no da-daun ha’u he-
la ho ha’u nia oan mane iha Bidau mak ha’u ba hili lata no lata ne’ebé mak Ha’u hili tetu tiha sorti iha dala ruma ha’u hetan $ 8. sorti laiha dalaruma hetan de’it $5,”dehan nia
Uma ne’ebé Vicente horik ba kondisaun la dignu ona, iha situasaun udan no anin boot, Vicente sente hanesan hela iha ai-leten, nakdoko hanesan anin huu ba mai, at liu iha tempu kalan dala ruma toba matan la dukur di’ak tanba tauk anin sobu kalen ka didin uma nian.
“Ha’u nia uma kondisaun la di’ak bainhira tempu udan ha’u labele hela iha uma, tanba udan bee tama de’it uma laran no ha’u labele hela iha uma ha’u tenke ba hela iha viziñu nia uma,” katak idade 90 ne’e.
Obervasaun Lafaek News haree avó Vicente nia uma ne’e kalen kuak taka ho kaixa no ai kabelak balun hodi tahan anin ho udan bainhira tau maka’as, tanba iha situasaun udan moris la hakmatek tenke evakua ba hela ho viziñu sira bainhira udan para ona foin fila fali ba nia uma.
Jornalista : Domingas Viana
Editora : Nelya Barros
