Lafaek News—Prezidente Pelican Paradise Datuk Dr, Edward Ong informa, konstrusaun Otél Fitun Lima Pelican Paradise hahú harii iha fulan Abríl 2023.
“Durante ne’e, ami halo servisu barak primeiru halo konkluzaun ba tenderizasaun hotu ona iha fulan Fevereiru nune’e hodi halo antisipa iha terenu to’o fulan Abríl tinan 2023 ami bele komesa servisu,”Prezidente Pelican Paradice Datuk Dr, Edward Ong hafoin remata enkontru ho Prezidente Repúblika José Ramos-Horta iha Palasiu Prezidensiál Bairu-Pite Segunda, ( 03/04/2023).
Edward relata, projetu ne’e kompañia konstrusaun development, signifika halo planu rasik depois halo jestaun no finanseiru ba projetu refere.
“Ami nia faze primeiru sei halo Otél fitun lima no mós halo apartamentu, bainhira ami komesa konstrusaun ami sei tau seguransa atu nune’e prevene komunidade soe lixu iha ne’eba,” katak nia.
Jestor Pelican paradise ne’e katak, nia parte sei diskute ho governu hodi buka solusaun ba okupante sira nia uma ne’ebé tama iha zona projetu ne’e, maibé responsabilidade governu nian, Pelican Paradise atu halo de’it planu jestaun ambientál ne’ebé aprova ona.
“Ami nia vizaun hanesan ho governu no povu nian, halo projetu ne’e bele hotu lalais hadia ambientál no loke vaga ba Timor oan, ami fiar ne’e ema hotu-hotu nia aspirasaun iha prosesu dezenvolvimentu nia laran sempre halo konsultasaun ho governu no lideransa,” nia haktenik
Enkuantu projetu Pelican Paradise ne’e halo lansamentu no asina plaka iha loron 25 fulan Novembru tinan 2022 husi Prezidente Repúblika José Ramos-Horta no primeiru Ministru Taur Matan Ruak iha Suku Tibar, Postu Administrativu Bazartete, Munisípiu Liquiçá.
Jornalista : Rita Moniz
Editór : Agapito de Deus
