Lafaek News–Kondisaun uma la estavel iha tempu udan no anin ho vilosidade maka’as, Faustino tenke dependente ba vizinu nia uma hodi salva an husi risku.
Esforsu an atu atinje mehi hadia hela fatin ne’ebe da-daun ho kondisaun at atu tempu udan labele provoka tahu nurak iha uma laran, maine kbiit osan la too atu atinje hakarak ne’e.
Faustino da Silva espresa nia sente triste bainhira tempu udan, toba la hakmatek, tanba udan ben sulin husi kalen leten ne’ebe dodok no iha kuak barak, hateke husi uma laran hanesan fitun iha lalehan, maske nune’e, esforsu aan hakarak hadia hodi taka netik kuak hirak iha kalen leten, no hanoi atu troka ona kalen foun, maine osan mak laiha atu sosa kalen foun hodi hadia.
“Tempu udan ami toba de’it iha vizinu nia uma, tanba ami nia uma laran nakonu bee entaun haree bee maran mak ami foin mai toba fali iha ami nia uma,” dehan Faustino ba lafaek news iha nia rezidensia Bidau akadiruhun Dili, sabado 14/08/2021.
Foustino da Silva ho idade 41, orijen husi munisipiu Dili ho nia espoza Filomena de Araujo husi munisipiu Vikeke, sira iha oan nain neen (6), kompostu husi feto ida mane nain 5, nain rua remata ona estudu, nain 2 sei eskola, no nain rua seluk seidauk eskola tanba tinan seidauk too atu eskola.
“Ami iha hanoin ne’ebe boot atu hadia uma ne’e, maibe ami nia kbiit la too atu hadia maske ami sosa ona material konstrusaun balu hanesan besi (Baza), maibe ami nafatin buka neineik atu hadia la hatene bainhira loos,” nia deklara.
Faustino afirma, dala barak governu ida atu sa’e ba ukun sira sempre halo promesa ba povu iha tempu kampañia eleitora katak, sira ukun sei hasai povu husi kiak no mukit, maibe tuir nia haree laiha governu ida mak implementa promesa ne’e.
“Husu ba estadu atu tau matan ba ninia emar neebe moris iha susar laran atu hasai ema kiak sira husi susar no mukit tanba tempu kampanha boot sira sempre promete ba ninia povu katak, sira mak ukun sei hasai povu husi kiak no mukit maibe realidade ukun tiha sira hasai deit aira nia familia husi kiak no mukit la iha interese ba povu seluk neebe agora susar hela,” Faustino rekomenda.
Nia konta, Durante tinan 10 resin ona moris hanesan ema negosiante dadeer tuku 07 sai husi uma ba faan modo iha fatin ketak-ketak too kalan mak foin fila ba uma tanba buat hotu presiza osan, maibe rendimentu la too atu hadia uma ne’ebe ho kondisaun at hela.
Iha observasaun Lafaek News nia terenu katak, da-daun ne’e Faustino nia uma kondisaun aat no la seguru atu hela tanba kalen balu iha uma kakuluk no didin uma ne’e monu da-daun no kalen balu komesa dodok sai fruzen no kuak hanesan ema lori pregu mak baku kuak.
Jornalista : Orlando Magno
Editor : Agapito de Deus
