Ainaru-(Lafaek News)—Reprezentante Komunidade suku Soru-Kraik postu administrativu Ainaru, munisípiu Ainaru Rita Gloria, espresa sentiment haksolok ho bee moos ne’ebé too ona sira nia hela fatin hodi asesu ba nesesidade lor-loron.
” Ami la Asesu ba bee mos ne’e Tinan barak ona, maibe ohin loron ne’e ami sente kontente loos tanba ami asessu ona ba bee mos, no ami kuru bee besik ona, ami la buka bee ona,” dehan Rita ba lafaek news hafoin partisipa iha inaugurasaun bee moos iha suku Soru-Kraik, kuarta semana ne’e.
Entretantu, Xefe Suku Suru-Kraik, Ronaldo Soares, husu Komunidade sira atu uza bee moos ho konsiénsia nune’e Jerasaun sira tuir mai mos bele uza nafatin.
“Tempu naruk nia laran ita enfrenta de’it problema bee moos, da-daun ne’e ita asessu ona ba bee mos, tanba ne’e husu ba komunidade hotu- hotu atu uza bee mos ne’e ho Konsiénsia, karik iha kanu bee nian ka tornera balun at, ita tenki hamutuk atu bele hadia fali,” Dehan Xefe Suku Suru Craik, Ronaldo Soares.
Xefe suku ne’e mós alert aba komunidade sira atu unidade hatama osan kada uma kain sentavus 25 ho objetivu manutensaun ba kanu bainhira avaria.
“Bee ne’ebé mak dada ba iha aldeia Bazar no Ai-Lau ne’e husi Aldeia Nau-Ulu,husi bee matan ho Naran Hitmata, ho distansia kilo metru 6 Mak to’o iha Aldeia rua ne’e,” esplika Ronaldo
Ronaldo dehan, bee ne’ebé dada ba komunidade ne’e inisiativa husi xefe suku Rasik no hetan apoiu material husi UNICEF, no komunidade mak halo servisu hamutuk hodi kanaliza ba suku laran.
“Bee matan Iha 3 mak kobre ba Aldeia 4, bee matan Lobalpu kobre ba iha aldeia No-ulu, bee matan Seul ba iha aldeia Ria-Mori, no bee matan Hitmata ne’e mak ba iha aldeia Bazar no Aldeia Ai-Lau,” hatete Xefe Suku Suru Kraik ne’e.
Xefe Suku ne’e Dehan, total tornera bee ba komunidade sira hamutuk 25, Aldeia Bazar no Aldeia Ai-Lau tornera 12, Aldeia Ria-Mori tornera 8 no Aldeia No-Ulu iha tornera 5.
Jornalista : Sandi Belo
Editora : Nelya Barros
