Lafaek News (Aileu) – Reprezentante Familia afetadu, Elsa Xavier informa, sira lakohi oferese rai hektares 16 hodi hari’i sidade universitáriu Aileu no sira prontu atu rezolve iha Tribunal, situasaun ne’e hatudu tuir lolos husi naan urat ne’ebé lia-nain sira hala’o ho sinal ladun di’ak.
Ami hanoin klaru antes tiha ona, desde inisiu kedas ami ko’alia tiha ona, ami mai ho ami nia prinsipiu, ami to’o ne’ebé de’it rai ne’e ami sei la oferese, tanba ami rai laiha ona, ami só oferese mak ne’e gratuita ba estadu hektares 60 sa’e ba leten nebá, karik ida nemak estadu hakarak obrigatoriamente hakarak halo buat ruma duni rai nia leten, dalan ikus mak ne’e ita hasoru malu iha Tribunal,” dehan Elsa Soares iha konferensia imprensa iha Mantane Aileu-villa, tersa (21/12/21).
Nia relata, komunidade sira la oferese rai ne’e ho razaun rai ne’e nu’udar rai eransa ba sira nia jerasaun no área produtiva ba agrikultura.
Ami la konkorda razaun Primeiru mak ne’e, ami hanoin ba sira ne’ebé agora kiik oan hela iha ami nia oin, tanba ne’e futuru ida ke tempu naruk mai, se aban bainrua sira boot mai mak rai tan jerasaun ba jerasaun, sira atu ba hela iha ne’ebé, ita boot sira hatene ita ba hotu sidade ne’e buka kabun, buka moris, mais aban bainrua sira tenke fila mai moris fatin. Ida ne’e ami nia rai eransa ne’e, ami laos hela iha rai estadu, ne’e ami nia rai eransa i rai ida ne’e mós agora ita boot sira mai rasik ona haree ho matan, ita boot sira bele haree ba toos laran katak rai ne’e produtivu ka lae, rai ne’e bele serve ba agrikultura ka lae,” informa Nia.
Antes hala’o lansamentu ba projetu refere, Primeiru Ministru Taur Matan Ruak mós hateten, odamatan sei nakloke ba familia afetadu sira ne’ebé seidauk hetan sira nia direitu.
Jornalista : Juvita dos Santos
Editor : Agapito de Deus
