Lafaek News—Komandante Jerál Polísia Nasionál Timor Lorosa’e (PNTL), Komisáriu Faustino da Costa, husu ba komandu polísia munisípiu bainhira hato’o informasaun ho relatóriu tenki hato’o dala ida, la’ós balun uluk depois seluk foin tuir.
Komandante munisípiu sira, relata informasaun tenki kompletu mai komandu jerál. Labele relata informasaun balun mai no balun la mai, Komjer Faustino ba jornalista iha sentru formasaun Polísia komoro-Dili, kinta (10/12).
Komjer mós husu, komandante munisípiu tenki hatene halo planu ba operasaun, nune’e bainhira akontese ou seidauk akontese krime ruma fasil bele halo atuasaun ou no mós fasil bele halo prevensaun.
Ikus nia apela no biban ne’e mós hanesan fó orientasaun ba komandante operasaun sira hotu, atu koloka kada membru ou ekípa nune’e bele halo kontrolu ba atividade ilegál ne’ebé akontese, ezemplu ki’ik sunu fugeti (petasan).
Nune’e bele kaptura ema ne’ebé koko ka tenta kria instabilidade ou pániku iha povu nia leet, tanba fugeti bainhira tarutu bele fó ameasa mós ba ema nia vida liuliu sira ne’ebé moras ka sofre korasaun.
Jornalista : Orlando Magno
Editór : Ezequias Tomás
