Kovalima, Lafaek News- Avo Maria Odete, agradese ba apoiu ne’ebé Sentru Quesadhip Ruak (CQR) oferese ba nia, tanba liuhosi apoiu ne’e bele satan netik nia hosi udan, anin no loron nia manas.
Maria Odete, hanesan ema vulneravel ka kbi’it la’ek, durante ne’e toba, han no hemu de’it iha udan no loron nia manas okos, kauza hosi uma ne’ebé ho kondisaun la di’ak.
Uma simplis ne’ebé nia horik ka hela ba, didin de’it ho Piku no taka de’it ho Kalen, más sasán hirak ne’e komesa aat ba daudaun ona, nune’e labele ona sai fatin seguru ba Avo Maria hodi hela ba.
Maski ho kondisaun ne’ebé limitadu la habaruk no la halakon Avo Maria nia fiar hanesan sarani Katólika ida, nia reza no entrega hotu ba aman Maromak, ho fiar metin katak orasaun ne’ebé hasa’e sei la sai hanesan orasaun de’it maibé sei nakfilak sai milagre iha loron ida.
Ho fiar ne’ebé metin, orasaun ne’ebé hasa’e ho laran metin ikus hetan duni rezultadu midar, tanba iha ema domin na’in balun, ne’ebé sakrifika aan tomak hodi buka apoiu tu’un sa’e hodi bele ajuda Avo Maria.
Esforsu hirak ne’ebé mane oan ho naran baibain bolu Jeferino hetan duni rezultadu, tanba iha sentru ida ne’ebé mós baibain toma konta halo atendimentu ba problema sosiál, simu proposta hosi Jeferino no prontu koopera hodi apoiu Avo Maria.
Sentru Quesadhip Ruak (CQR) ne’ebé lidera hosi espoza Jenerál Taur Matan Ruak atúal Xefe Oitavu Governu, Isabel da Costa Ferreira, responde proposta Zeferino liuhosi apoiu materíal mak hanesan Kalen uma tahan 40, Pregu kalen kaixote ki’ik 2, Foos saku 2 inklui Foos rai 10kg, Supermie kaixote 2, Masimidar 8kg no káfe paak 2 inklui uza transporte tula sasán mai.
Ho apoiu ne’ebé hetan hosi CQR, Avo Maria ho matan ne’ebé nakonu ho matawen espresa ninia sentimentu hodi hasa’e agradesimentu tanba liuhosi na’i nia grasa no tulun, iha ema (CQR no Zeferino) laran osan me’an hakarak ajuda nia.
Hodi fó esperansa tomak ba nia bainhira deskansa sei hakmatek, tanba udan sei la kona no loron nia manas mós sei la kona tan. Avo Maria hatudu espresaun kontenti ne’e bainhira hahú simu apoiu no mós bainhira dada lia uitoan ho jornalista LafaekNews ne’ebé akompaña prosesu lori no to’o entrega apoiu refere.
“Durante ne’e ha’u sente la hakmatek bainhira udan bo’ot, tanba ha’u toba de’it iha fatin ne’ebé bokon. Maibé ohin loron sente kontenti, tanba sira (CQR) bele ajuda ona ha’u troka kalen ne’ebé dodook nakonu ho ku’ak,” Avo Maria ba LafaekNews iha nia rezidénsia Beko-Kovalima, foin lalais ne’e.
Entretantu iha sorin seluk, Vise Administrasaun CQR, Mardoqueu Soares, rekoñese antes ne’e hetan informasaun liuhosi media kona-ba kondisaun Avo Maria ninian.
“Ami haree notísia lafaeknews kona-ba Avo maria. Maibé la konsege buka tuir tanba kestaun ba tempu. Maibé iha loron 20 fulan outubru, ami simu proposta hosi irmão Jeferino kona-ba Avo Maria nia moris,” nia subliña
Nune’e ikus nia hatete, hafoin simu proposta hosi Jeferino, no sente katak Avo Maria presiza tebes ema nia tulun, ami deside ohin loron lori ekipamentu konstrusaun inklui mós ai han balun.
Jornalista : Orlando Magno.
Editór : Ezequias Tomás
