Lafaeknews– ohin 09/03/2021, Ekipa saúde deteta tan kazu pozitivu COVID-19 foun hamutuk ema na’in 13, ho nune’e Vise-kordenadora forsa tarefas ba prevensaun no mitigasaun surtu covid-19, Odete Viegas, informa, husu ba komunidade iha Dili labele paniku hakmatek iha uma, no mantein kumpre regra prevensaun hanesan fase liman, uza maskra evita halibur malu
“Hafoin deteta kazu foun rua iha bairu BTN 2, Tasi Tolu, Suku Madohi, Postu Administrativu Dom Aleixo, to’o horseik ekipa konjunta saúde buka tuir nafatin kontaktu besik sira husi kazu rua ne’e Husi ezersisiu ida-ne’e, ohin ita deteta tan kazu pozitivu 9 husi kontaktu besik ho kazu husi sidadaun ida ne’ebé nu’udar funsionáriu administrasaun públika ne’ebé pozitivu iha SEFOPE, no ida iha Bebonuk, inklui Ospital Nasional Guido Valadares deteta Kazu 3 iha Óspital Nasionál ne’e profesional saúde ho nia-oan na’in 2 hamutuk 13 ,” esplika Vise-kordenadóra forsa tarefas ba prevensaun no mitigasaun surtu COVID-19, Odete da Silva Viegas, liuhusi konferénsia imprensa iha Sala situasaun SIJK,CCD, Tersa ( 9/04/2021).
Nia afirma, Kazu pozitivu ida ne’ebé husi Bebonuk ne’ebé relata horseik 8 marsu, husi kazu ida -ne’e mós ekipa konjunta saúde halo kedas rastreiu horseik, husi rezultadu rastreiu ne’e iha deteta tán kazu ida iha Bebonuk
Odete salienta, maske kazu pozitivu iha Dili aumenta maibé apela ba populasaun iha Dili laran tomak atu nafatin kalma, lalika pániku, hela de’it iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona uza máskara, Fase liman bebeik ho sabaun ka dezinfetante ruma, wainhira kumprimenta malu, la presiza kaer-liman, bensa-liman, rei-malu ka haku’ak malu, Evita halibur malu barak, Hamri’ik ka tur dook husi ema seluk, mínimu metru ida ho balu.
Nune’e, Aproveita mós oportunidade ida ne’e atu informa ba públiku katak atividade rastreiu seletivu massa horseik 8 marsu amostra ne’ebé ekipa foti hamutuk 471. (Husi SEFOPE amostra ne’ebé rekolla hamutuk 28, Ministériu Transporte no Komunikasaun 137, TIC 46, Bebonuk 51, Ministériu Finansas 82, Óspital Nasionál 3 no Gabinete Primeiru-Ministru 124.) Ohin, ekipa konjunta saúde kontinua nafatin buka tuir kontaktu-besik iha SEFOPE, MTC, HNGV nomos Bebonuk Ita hein rezultadu iha loron hirak tuir mai, esplika Odete
dadus jerál ba loron 9/03/2021 ohin nian Kazu foun: 13, Kazu rekuperadu: 0, Kazu ativu: 48
Jornalista : Sandi Belo
Asisten Editór : Egidio Nono
