Lafaek News—koordenadór forsa tarefas ba prevensaun no mitigasaun surtu Covid-19, Rui Maria de Araújo, informa, ohin ekipa konjunta saúde deteta tan Kazu pozitivu Covid-19 foun na’in 23, kompostu husi Dili 22 no iha Baukau na’in 1, Dadaun ne’e atual baixa sa’e ba 138
“Kazu na’in 23 ohin, iha mane nain 8, feto na’in 15, Idade entre tinan 10-14: ema 3, Idade entre tinan 18-60 nian 20, Sintomátiku 1, asintomátiku 22, enkuantu husi horiseik mai ohin hamutuk hotu halo 543 exames,” esplika koordenadór Forsa Tarefa ba Prevensaun no Mitigasaun Surtu Covid-19, Rui Maria de Araújo, ba jornalista sira liu husi meeting zoom, sesta (19/03/2021).
Ho nune’e, kazu detetadu ka pozitivu iha Munisípiu Dili husi dia 7 de Marsu 2021, to’o ohin,19 de marsu 2021, hamutuk hotu 117, no husi Kazu detetadu 117 iha Dili ne’e, fahe ba cluster 30, namkari iha instituisaun 4, eventu 1 no Suku 8, no fatin kuarentena 1, iha Postu Administrativu D. Aleixo, Vera Cruz ho Cristo Rei.
Iha munisipiu Baukau, ohin iha kazu foun 1, Hamutuk hotu Munisípiu Baukau deteta ona kazu konfirmadu na’in 8, Kazu foun ida ne’e, hela iha Aldeia Lamegua, Suku Bahu, Baukau Vila, Kazu konfirmadu ida- ne’e halo viajen husi Diliba Baukau iha dia 5 de Março, Iha Dili nia hela iha Aldeia 2 de Abril, Suku Santa Cruz, Postu Administrativu Na’in-Feto.
Entretantu, dadus ne’ebé iha kazu hirak ne’ebé detetatu iha Baukau (nain 8) no iha Vikeke na’in(3) kazu ne’ebé lori sai husi Dili maka ba, entre 5 ho 9 de Marsu de 2021, no dadus jerál Covid-19 ba loron ohin 19/03/2021 nian; Kazu foun ohin: 23, Kazu rekuperadu: 4, Kazu ativu: 138.
Jornalista : Sandi Belo
Asisten Editór : Egidio Nono
