Lafaek News—Prezidente Repúblika (PR), Francisco Guterres Lú Olo, afirma nu’udar aman ba estadu ne’e husu autoridade públiku no Polísia Nasionál Timor Leste (PNTL) atu halo tratamentu hanesan ba ema hotu.
“Autoridade publiku sira atu trata ema hot-hotu hanesan. autoridade polisiál mos tenke hatudu tratamentu hanesan ba ema hotu, tenke aplika regra ba ema hot-hotu, labele haree ba ema nia estatutu polítiku, sosiál ka ekonémiku, lei ba ema hot-hotu! labele hatudu tratamentu ba ema ho maneira ne’ebé lei la hateten,” katak Xefe Estadu, Francisco Guterres Lú Olo, liu husi mensajen ba povu tomak iha palasiu prezidénsia Bairru-Pite, sesta (19/03/21).
Eis prezidete Parlamentu Nasionál lezislatura dahuluk ne’e fundamenta, estadu hatuur ona nia lei no regras ba povu nia moris, maski lei no regras la’o ho nia exepsaun, ema hotu-hotu tenki kumpre, bainhira ema ka grupu viola regra, autoridade kompetente tenke barani foti medida tuir lei no medidas ne’ebé hatuur ona, atu ema ida-idak bele hasees-an husi moras at ne’e.
Importante tebes iha kondisoins no fasilidades atu autoridade publika sira bele halo sira-nia knaar didi’ak. Prezidente Republika husu atu Governu tau matan di’ak liutan ba pesoal sira hotu ne’ebé halo servisu iha lifa-oin hodi ita bele luta ho susesu hasoru Moras at ne’e.
Nune’e mos haree ba evolusaun moras Covid-19 iha Timor Leste, importante tebes hatuur planu nasionál ida ho mekanizmu koordenasaun nasional di’ak liu entre liñas ministeriais, no entidade seluk estadu nian.
Ministériu ida-idak iha planu rasik hodi oinsá hatan kedas ho nia ema no ekipamentu, hare’e oinsá envolve komunidade lokal hodi ajuda hatan ba transmisaun husi virus ida ne’e, prepara ona sentrus kuarentena no izolamentu iha munisipiu hotu-hotu ho fasilidades lo-loos, rekursus umanus natoon no ekipamentu di’ak, atu corona virus labele hada’et iha fatin sira ne’e.
“Ha’u fiar katak Governu halo da-daun esforsu atu hatan ba situasaun foun ida ne’e,” PR Lú Olo subliña.
Xefe estadu ne’e rekoñese kazu pozitivu sa’e maka’s iha rai-laran, tanba ema balun hakaat subar fronteira-rai no Timor-oan barak sai husi Dili molok hahú serka sanitaria, tanba de’it maluk balu lakohi rona, ohin loron iha ona kazu pozitivu iha Baukau no Vikeke.
Prezidente Repúblika husu bo’ot ba maluk sira atu -Tuur hakmatek iha fatin atu nune’e f6 tempu ba Governu foti medida no proteje ita ida-idak no ita hothotu: respeita ekipa saúde bainhira halo evakuasaun médika ba pasiente ho moras Covid-19 no husu mds ba autoridade lokl sira atu kontribui, pasiente sira mos merese respeitu.
Prezidente Repúblika mós preukupa kona-ba sidadaun balun ne’ebé tuda kareta ekipa saúde nian, husu ba parte seguransa, liu-liu PNTL, atu asegura ekipa saúde hodi hala’o sira-nia kna’ar no foti medidas prevensaun ba violénsia hasoru ekipa saúde, tuir lei haruka.
“La haluha fo apresiasaun espesial ida ba pesoal saúde no ita-nia maluk sira hotu iha liña oin ne’ebé servisu maka’as tebes. Louva pesoal seguransa hotu ne’ebé mak hein ita-nia fronteira loron-kalan no pesoal seguransa sira seluk ne’ebé mak loron kalan servisu maka’as,” PR apresia.
Nu’udar Prezidente Repúblika, hakru’uk ba ema hotu iha setór públiku ne’ebé mak kontinua halo nafatin servisu esensiál sira ba povu ida-ne’e, la haluha agradese mos kontribuisaun husi organizasaun sosiedade sivil sira iha prosesu tomak hasoru moras Covid-19 ne’e no mós ba parseiru internasional sira.
“Ha’u husu ba lider Politiku sira, intelektual sira, akadémiku sira, estudante sira, relijioza no jurista sira atu ajuda haklaken lia los kona ba corona virus ba ita-nia Povu hodi hatene diak liután, halo de’it ida ne’e natoon ona! Tanba sa? Tanba ita-nia maluk balun seidauk hatene loloos moras at ne’e nia konsekuénsia no la halo tuir regras satide nian, sira ne’e presiza tebe-tebes imi-nia tulun, ita hotu nia tulun,” PR rekomenda.
Jornalista : Egidio Nono
Editora : Nelya Barros
