Lafaek News—Komisaun Organizadora konstrusaun kapela Saun João Baptista Katrai-Leten, Domingos Fernandes husu sarani no komunidade Katrai-Leten estasaun missionáriu St. Inacio Loyola Lauana, postu administrativu Letefoho munisípiu Ermera ne’ebé namkari iha rai-laran no diaspora husu kontribuisaun orsamentu hodi realiza serimonia inaugurasaun.
Entretantu, tuir ajenda fisku husi komisaun organizadora ne’ebé ofisializa ona data inaugurasaun sei akontese iha inísiu fulan Setembru 2023 iha suku Katrai-Leten, postu administrativu Letefoho, munisípiu Ermera.
“Ho respeitu relasiona pedidu ne’ebé mensiona iha leten ami husi komisaun konstrusaun kapela Saun João Baptista Katra-Leten, ho haraik-an hakbesik mai too iha ita boot sira nia hela fatin atu bele husu ita boot sira nia apoiu, ka lolo liman ba malu, kahe kbaas ba malu, hodi fo apoiu ba ita nia uma lisan inan, kapela Saun João Baptista, ne’ebé da-daun prepara kona-ba inaugurasaun,” katak Prezidente KO atual xefe suku Katrai-Leten, Domingos Fernandes ba lafaek news foin lalais ne’e.
Tan ne’e, ho neon ho laran tomak, nu’udar Prezidente komisaun organizadora husu ita boot sira-nia apoiu no tulun liu husi orsamentu atu bele hala’o preparasaun diak ba festa inaugurasaun kapela Saun João Baptista iha inisiu fulan Setembru tinan ne’e.
“Mak ne’e de’it, bai ta hotu nia laran luak no apoiu ba malu ami la haluha hatoo obrigadu-wain, ami ne’ebé organiza ha’u rasik Prezidente komisaun ogranizadora, Domingos Fernandes, Katekista Pedro da Silva Gomes, Dewan estasaun, Miguel Maia Gomes no tezoreiru Pedro Diamentino de Deus,” nia hakotu.
Jornalista : Natalino Correia Lopes
Editor : Agapito de Deus
