Lafaek News–Ajenda kampania datoluk sesta (04/03/22), eis Prezidente partidu Frente-Mudança, José Luis Guterres kexar Francisco Guterres Lú Olo, ba populasaun vikeke katak prezidente repúblika viola konstituisaun RDTL durante periodu mandatu.
Lugu dehan, mandatu Prezidente Francisco Guterres Lú Olo, iha tinan lima nia laran, hamosu violasoens lubuk ida ba konstituisaun repúblika, hanesan violasaun ba Artigu 77º, la kumpre Juramentu ne’ebé hasai iha Tomada deposse, iha juramentu, nia dehan ‘sei kumpre no halo ema hotu kumpre Konstituisaun no Leis sira’, maibé simu tiha posse, nia viola tiha ninia juramentu hodi la halo tuir Konstituisaun no Leis sira.
Violasaun ba Artigu 16º. (2) – kona-ba deskriminasaun iha direito sidadaun Timor oan tamba konviksaun politika la hanesan, no ba Artigu 69º. – Separasaun dos Poderes, hodi viola gravemente poderes órgauns seluk nian, no. Artigu 106º. (2), tanba ne’e husu populasaun Vikeke-oan tomak atu hili Prezidente Repúblika ida ne’ebé matenek hodi halo repozisaun ordem konstitusional no ordem estadu direitu demokrátiku.
Tempu ona hili José Ramos Horta hodi hadia fali konstituisaun ne’ebé durante ne’e ita nia prezidente repúblika viola tiha ona,’’ katak Lugu iha nia intervensaun dahuluk iha kampu Beloi Vikeke, sesta (04/03/22).
Lugu dehan, mundu konese José Ramos Horta, tanba halo servisu barak iha rai liur ho nasaun barak hodi reprezenta Timor Leste nia naran iha mundu, tempu ona atu hadia hikas imajen Timor iha komunidade internasional nia oin liga lala’ok prezidente repúblika Francisco Guterres Lú Olo komete ona iha nia mandatu.
Povu Timor husi Oe-kusse too Lautem husi Tasi-Feto too tasi mane laran metin iha Xanana Gusmao ho José Ramos Horta, tanba ema nain rua ne’e hadomi povu no hakarak liberta povu husi kiak ho mukit, tempu ona povu moris di’ak no moris iha liberdade iha nasaun demrokrátiku ida ne’e.
Vikeke oan sira hanoin didi’ak iha loron 19 keta hili sala, maibé vota ba ita nia lider ne’ebe iha matenek hodi rezolve problema iha rai laran,’’ Lugu hakotu.
Iha fatin hanesan, Veteranu Gil Oan Soru iha nia intervensaun polítika husu povu Vikeke labele hakfodak ba lia falsu sira ne’ebé lao maka’as liu husi door to door hodi bosok veteranus sira katak veteranu sira tun sa’e katak subsídiu veteranu ne’e sira mak halo, maibé konstituisaun hakerek nanais ona katak se de’it mak ukun nasaun ne’e subsídiu kontinua ba veteranus, frenta klandistina no idozus ferik katuas sira.
”Labele hili polítika bosok hodi lori nasaun ba rai kuak, lori povu ba moris terus no susar, hili polítika ne’ebé tane as interese estadu, tane as povu luta nain sira hodi garante justisa ba ema hotu, husu inan-aman feto faluk oan kiak sira, ohin loron imi sai oan kiak, tanba rai ne’e, imi lakon fen lakon laen iha funu laran hodi sosa ukun rasik an, maibé ukun rasik an ne’e imi labele terus tan ho ema nia polítika foer hodi lori povu ba moris iha impase polítika,” katak Gil Oan Soru.
Jornalista : Agapito de Deus
Editor : Floriano Soares
