LafaekNews-Kuarta, (25/09/2024), Komisáriu Komisaun Anti Korrupasaun (KAK, sigla portuges), Rui dos Santos hateten, KAK submete ona auto notisia kazu Diretor Geral (DG) ho inisial RGG ne’ebé suspeita ba kazu fo projetu ba nia maluk iha Ministeriu Agrikultura Peska Pekuria no Floresta.
Komisáriu ne’e esplika, KAK hanesan orgaun polísia kriminal ne’ebé iha kompeténsia tuir lei haruka hodi halo identifkasaun ba ema ida de’it iha 12 oras de tempu, hafoin ida ne’e, KAK halo auto partisipasaun hodi hato’o ba Ministériu Públiku.
“Komisáriu atu update de’it katak, servisu identifkasaun ne’ebé KAK halo ba pesoal tékniku ka dirijente Ministeriu Agrikultura Peskas, Pekuaria no Floresta foin dadaun ne’e, KAK konklui ona nia prosesu. Informasaun ne’ebé ita iha, relatóriu Ita enkamina ona ba MP Auto partisipasaun ne’e ita enkamina ba Ministeriu Publiku iha segunda (23/9) foin dadaun ne’e,” Rui dos Santos hateten ba jornalista iha nia kna’ar fatin KAK Farol,
Nia dehan, bazea ba rezultadu indentifkasaun ne’ebé KAK halo ba inisial RGG ne’e KAK detekta katak iha duni indisiu katak RGG envolve duni iha kazu fo projetu ba nia amigu Ministériu Agrikultura Peskas, Pekuaria no Floresta (MAPPF) ne’ebé viral iha midia sosial.
“Portantu ami hatama ne’e ho razaun balun katak iha indisiu, tanba ne’e ami enkamina partisipasaun ne’e ba Ministériu Públiku para sira rejista no sira sei hare’e iha buat balun ne’ebé mak sira sente KAK presiza kompleta Tan entaun Ministériu Públiku sei haruka fila fali mai KAK hodi rekolla informasaun hodi kompleta “, nia haktuir
Nia dehan, durante prosesu idenfikasaun ba RGG KAK rekolla evidensia sira mak hanesan telemovel RGG nian hodi hare konvesaun sira iha via Watshapp no iha voice ne’ebé durante nia uza lian materna hodi haruka ba nia kolega.
“Ekipa sira mós halo ona tranakrisaun ba voice sira iha dijente ne’e nia telemovel, tanba ita hetan voice ida iha nia watshapp iha ema ida ko’alia lian materna entaun ami halo kordenadasaun ho PSIK hodi sira bele halo ezaminasaun ba dijente ne’e ninia telefone tanba PSIK mak ekipamentu ba iha ezaminasaun forensik Information and Technology nian hodi hare’e mesajen no voice sira ne’e tanba ita tauk keta la’os nia mak halo karik ou iha ema seluk mak halo”, Nia afirma.
Tanba, KAK hanesan polisia espesializadu ne’ebé iha poder hodi halo Investigasaun maibe Comisaun Anti-Corupsaun la iha ekipamentu atu halo ezaminasaun ba ekipamentu sira hanesan ne’e, tanba ne’e iha prosesu KAK la mesak, maibe servisu hamutuk kordenasaun PSIK tanba sira mak iha ekipamentus hodi halo ezaminasaun ba telefone, kuandu mensajen balun sira delete ona, ho Ida ne’e hodi bele dada fali mensajen ne’ebé delete ona.
Rui dos Santos hateten, KAK konsidera prosesu ne’e hanesan segredu justisa tanba ne’e KAK lakohi haklean liu tan faktu sira ne’ebé aprezenta iha prosesu ne’e.
“Agora prosesu ami enkamina ona ba Ministeriu Públiku no ami hein bainhira mak Ministériu Públiku delega fali mai KAK mak ita sei bolu ema sira liga kazu ne’e hanesan testemuñia nain hira, dokumentu saida mak presiza telemovel sira ne’ebé sira uza hodi halo komunikasaun”, nia hakotu
Ekipa kobertura: Lafaek News
