Lafaek News—Juventude aldeia Asalainu suku Fuiloru postu administrativu Lospalos kestiona atuasaun PNTL Lautém atuasaun laiha seriedade, tanba provokasaun juven balu husi bairru Motolori rezulta estudante husi aldeia Asallainu hetan kanek.
Kestaun ne’e juventude aldeia Asalainu levanta liu husi konferénsia imprensa iha sesta (12/03/21), relasiona atuasaun PNTL Lautém la neutru no husik livre fali joven balu husi Motolori ne’ebé sempre lansa provokasaun hasoru juventude Asalainu, tan ne’e husu komandu jerál PNTL atu aviza membru polísia halo atuasaun iha terrenu tenke ho professional tuir lei ho ordem.
Iha koneferénsia imprensa ne’e, portavóz Jorge da Costa hatete, juventude Asalainu deklara ona iha loron nasionál Falintil 20 de Agusto 2020, katak joven Asalainu evita hahalok ne’ebé laiha benefísiu no hamosu konflitu bei-beik, husi deklarasaun ne’e hatudu iha prátika iha loron konsuta popular 2020 ho asaun ne’ebé muda mentalidade konstrutivu, maibé tanba saida mak maluk joven sira husi bairu Motolori tenke provoka bei-beik too hakanek estudante na’in rua husi Asalainu.
“Ami nia deklarasaun ida ne’e ami hatudu ona iha prátika liu husi komemorasaun loron 20 de Agustu loron FALINTIL no loron konsulta popular 2020, husi asaun ne’ebé ami halo hodi muda ami no pasadu ne’ebé nakonu ho konflitu, maibé ami sempre hetan provakasaun no sai vitima ba Juventude motolori, akontesimentu iha vila Lospalos iha dia 10 Marsu 2021,” katak Jorge ba jornalista sira iha koneferénsia imprensa, sesta semana ne’e.
Portavos ne’e dehan, estudante na’in rua husi aldeia Asalainu bainhira sai husi eskola hetan provokasaun husi joven balu ho inisial G husi bairru Motolori aldeia Lospalos villa baku estudante na’in rua ne’e too hetan kanek.
“Ami nia joven nain rua sai husi eskola joven ida husi motolori ho naran inisial (G) organiza nia maluk sira halo provokasaun hodi baku ami nia joven nain rua rezulta ida hetan koa iha parte liman karuk, ida hetan tuku iha ibun laran tuku no tebe no sama husi nia maluk sira, vítima nain rua PNTL Lautém lori ba ospitál hodi hetan tratamentu iha momentu ne’ebá duni hetan kapturasaun ba autor hatama iha sela, maibé iha 24 horas nia laran de’it PNTL Lautém husik tiha autor , ami la satisfas tanba autór ne’e nia kazu barak ona, PNTL Lautém laiha seriedade kontinua fó livre ba nia hodi halo provokasaun,” xefe juventude aldeia Asalainu ne’e kestiona PNTL Lautém.
Jorge fundamenta, Juventude Asalainu hakribi ona konflitu hakrak kontribui ba dezenvolvimentu nasaun, maibé joven balu iha aldeia ne’e kontinua hetan provokasaun husi joven sira iha bairu motolori, tanba ne’e komisáriu PNTL Faustino da Costa, atu alerta ba komandu PNTL Lautém orienta nia membru polísia sira servisu ho professional hodi atua kazu hakanek estudante na’in husi husi joven Motolori.
Hatan ba lamentasaun ne’e komandante PNTL Munisípiu Lautém Superintende Polísia, António Rego Fernandes, kalrifika katak depois akontese suspetu sira halai ses ona husi fatin ne’eba hafoin polísia too no foti de’it vítima sira lori ba parte polísia investigasaun, hodi foti dadaus, ikus mai notifika no foti suspetu nain tolu submete ba auto partisipasaun no identifikasaun.
“Bazeia ba lei sira polísia nian kompeténsia to de’it tempu ka oras 12, ita liberta fila-fali ema sira ne’e tanba kazu ne’e nia natureza ne’e sei iha Ministériu Públiku, bainhira Ministériu Públiku fo fali delegasaun kompeténsia ba ami hodi nune’e halo kontinuasaun ba prosesu ne’e,” katak komandante PNTL Lautém ne’e.
Jornalista : CE Lautém
Editora : Nelya Barros
