Lafaek News—Inan faluk Isabel Oliveira Ribeiro ho idade 69, preukupadu ho presu foos iha merkadu husi kilu grama 25 sa’e ba $17, bele afeta ba povu kbiit laek sira ne’ebé osan laiha.
Governu liu-liu ministériu kompeténsia la liga rai, maske rona hela lian halerik sira iha sidade no foho ligadu ho presu merkadu liu-liu foos folin kontinua sa’e, impaktu ba ema sira ne’ebé kiak ba osan atu sosa foos saka ida ne’ebé folin karun.
Realidade iha sidade Dili, inan faluk Isabel Oliveira Ribeiro, hela iha Beto Tasi Suku Madohi Postu Don Aleixo, afirma katak nia parte preukupa ho folin foos ne’ebé iha Merkadu s ae ba bei-beik, ema ne’ebé iha osan bele sosa, maibé susar ba sira be osan laiha.
“Ami kuda modo máka foin hetan osan hodi sosa foos, osan iha dolar ida, dolar rua maibé ne’e sosa foos mós lato’o, tanba karon ida 25 kg folin agora sa’e ba dolar sanulu resin hitu (17), entaun osan lato’o atu hola hodi responde ba nesesidade uma laran,” dehan Isabel Oliveira Ribeiro, ba lafaek News foin lalais ne’e iha aldeia Beto-Tasi.
Inan faluk ne’e agradese tebes ba governu hodi kria programa sesta bázika fahe netik ba populasaun sira hodi ha’an, maibé governu tenke kontrola presu merkadu au bele fó biban mós ba maluk ne’ebé kapasidade finanseiru la sufisiente bele sosa.
“Ami nia oan ida máka ajuda fó foos ba ami hodi tein, maibé dala ida-ida, tanba forma ona familia hare’e mós oan sira nia eskola entaun araska, foin lalais simu sasan sesta Bázika sente di’ak maibé to’o agora hotu tiha ona,” tenik nia.
Inan Isabel haktuir, kona-ba osan idozu nian asesu ona, maibé tinan ida máka foin simu osan ne’e, molok simu osan ne’e kesi kabun mak foin bele simu tanba la’os simu kada fulan, at liután atakae maka’as Covid-19, sasan hotu folin sa’e susar ba nia atu sosa foos ne’ebé karun.”
“Husu ba parte relevante atu hare’e foos folin ne’ebé sa’e atu nune’e ami ne’ebé kbi’it laek, forsa laiha bele sosa hodi konsumu loron-loron,” inan faluk ne’e sujere.
Jornalista : Ekipa Sosiál LN
Editora : Nelya Barros
