Lafaek News— Noel Lay ho idade 27, defisiensia matan, liman no ain, hela iha Aldeia Beto Tasi, Suku Madohi, postu administrativu Dom Aleixo, Munisípiu Dili, la tuur iha uma labele hein de’it governu loke kampu servisu, pineira rai-henek iha mota laran mós hanesan kampu servisu ida tanba hetan osan hanesan.
Defisiensia Noel Lay la’o hela iha dalan atu ba mota Komoro. imajen Pedro de Almeida.
Noel ho kondisaun ne’ebé la merese ona halo servisu todan hanesan pineira rai-henek, loron manas provoka mota laran manas liután, kosar metan suli habokon ropa isin lo-loon, ho pasiénsia no hanoin iha laran katak atu hetan osan primeiru tenke terus, servisu hanesan atan ha’an hanesan liurai.
“Rai-henek ne’e loron-loron ha’u ba pineira de’it, maibé atu suru fali ha’u senti labele tanba suru ba kareta laran ne’e araska, entaun ha’u selu fali kolega sira seluk maka foin suru rai henek ba kareta laran, se barak nafatin ha’u ajuda suru ba karreta,” dehan Neol Lai ba Jornalista lafaek news iha Aldeia Beto Tassi, suku Mahadoi, kinta, (04/03/2021).
Nia hatutan, bainhira dadeer husi toba fatin hamanas fuan ho kafé manas kopu ida ho paun fuan ida, matabixu hotu ona, aruma material rai-henek nian hodi hakat da-daun ba mota laran, sorte di’ak pineira husi dadeer too lokraik hetan ret-1, hein de’it ema lori osan hodi sosa rai-henek ho $15 osan foos nian iha ona.
Defisiensia Noel suru hela rai-henek so’e ba karreta laran iha mota komoro, imajen Pedro de Almeida.
“Ha’u hakarak hala’o atividade ida ne’e, maske ladún di’ak ba ha’u nia kondisaun ne’e, maibé ha’u deside servisu ida ne’e para ha’u presiza buat ruma karik ha’u hola rasik labele tane liman de’it ba inan aman, tanba ha’u toman ona entaun ha’u tenki buka osan liu husi rai-henek,” nia esplika.
Rai-henek ne’ebé pineira ret-1 ida $15, maibé osan sei fahe fali ba nia maluk sira be ajuda suru rai-henek ba karreta, tanba Noel forsa soe rai-henek ba karreta leten la too, tanba karreta nia bak naruk liu, dala ruma mós Noel suru rasik tula ba karreta, tanba nia maluk sira tula hela rai-henek ba karreta seluk ne’ebé mai sosa.
Aliende hala’o atividade Pineira rai-henek iha mota laran, Noel mós halo kantreiru kuda kanko no modo atu nune’e sai mós alternativa id aba nesesidade uma laran.
Bainhira entrevista ne’e atu konklui, defisiénsia ne’e husu ba maluk Timor-oan sira lilu-liu joven sira labele mo’e buka osan, tenke servisu maka’as hodi hetan osan ba sustenta ekonomia uma laran atu nune’e labele depende de’it governu loke kampu servisu.
Jornalista : Ekipa Sosial
Editór : Nelya Barros
