Lafaek News—Aniversáriu Partidu Demokrátiku ( PD) dala rua nulu resin- rua (22) Prezidente Repúblika José Ramos-Horta husu Partidu Demokrátiku prepara an hodi serví povu no rai ida ne’e hanesan jerasaun foun.
“Partidu Demokrátiku eziste tinan 22, iha ano dala ida, ano primeiru, mensajén mak ne’e prepara an, prepara an, tanba ita la prepara an didi’ak lakon tempu loron la’o dadaun loron ida ne’ebé mak liu ona la fila, Semana ida liu, Semana ida liu ona ne’e duni prepara an, tanba ita to’o iha 2027_2028, sei tau iha jerasaun foun kompletu nia kabas”, dehan Prezidente Repúblika José Ramos-Horta ba Jornalista iha ambitu komemorasaun loron 22 partidu Demokrátiku iha sede Partidu PD Kolmera, ( 10/06/2023).
Xefe Estadu ne’e sublina, jerasaun foun ne’ebé hahú ona iha 2022, dezde primeiru governu jerasaun foun tama iha governu mak hanesan PD ema balun Independente balun ho FRETILIN de’it elementu independente.
“Ha’u nia mandatu falta tinan 4, ha’u sei buka serbisu hamutuk ho jerasaun foun ho PD maibé ho FRETILIN sira hotu-hotu atu bele haree jerasaun 2027 ba oin, no ho Avo Nana governu atuál ho PD tenki halo buat ne’ebé di’ak liu estruturasaun Estadu nian ba iha setór hotu-hotu ekonómia tenki forti nune’e 2027 entrega, nasaun ida ne’ebé mak unidade makás liu Demokrasia nafatin no povu nia moris la’o di’ak investimentu bo’ot mai iha Timor Leste,” Horta salienta.
Entretantu Prezidente Horta mós husu ba PD no CNRT atu tau estrutura ho ekilibriu do jéneru iha governu nia laran, tenki haree tau feto sufisiente labele mane de’it, feto barak iha mundu ne’e matenek barak tebe-tebes, Timor mós feto barak matenek serbisu di’ak liu mane sira, no labele halo vingansa, persegisaun duni ema sai arbiru.
Xefe Estadu ne’e mós hato’o parabéns ba aniversáriu partidu demokrátiku no ba estrutura PD tomak maske seida’uk hahú formasaun governu da-sia boa sorte ba hotu-hotu.
Fatin hanesan Prezidente partidu Demokrátiku (PD), Mariano Asanami Sabino hateten, PD hotu-hotu nian, hotu-hotu hein katak PD ba estadu no ba hotu-hotu hein katak PD sei buras, sei la’o di’ak nu’udar kontinuasaun husi prinsípiu lutador sira katak nasaun ida ne’e sei sai nasaun Demokrátiku.
“Aniversáriu ida ne’e ha’u hanoin katak importante tebe-tebes tanba aniversáriu Partidu PD ba 22 anos, Partidu Demokrátiku eziste, tanba PD ita hotu nian, ita hotu-hotu hein katak PD ba estadu no ita hotu-hotu hein katak PD sei buras, sei la’o di’ak nu’udar kontinuasaun husi prinsípiu lutador sira katak nasaun ida ne’e sei sai nasaun Demokrátiku. Valores demokrásia sei sai lisan ba ukun no lisan ba moris”, dehan Prezidente PD.
Enkuantu iha biban ne’e Prezidente Partidu Demokrátiku ne’e mós apresia ba jornalista hotu ne’ebé mak durante ne’e esforsu hakas an buka nafatin informasaun hodi haboot Partidu Demokrátiku.
Jornalista : Rita Moniz
Editór : Agapito de Deus
