Lafaek News–Ministru Transporte no Komunikasaun (MTK), José Agustinho informa, iha loron 25 fulan novembru 2021 Ministériu Transporte no Komunikasoens sei atribui sertifikadu ba Ró ahi Berlin Nakroma ne’ebé oras ne’e paradu hela iha ne’e.
Iha tempu badak ita sei ba halo manutensaun, ita hatene katak durante ne’e ita nia ró ahi uza hela bandeira ita nia nasaun viziñu Indonezia,” dehan MTK José Agustinho Hafoin hasoru malu ho Primeiru Ministru Taur Matan Ruak iha Palasio Governu Dili, tersa (23/11/21).
Ne’eduni iha tempu badak sei atribui sertifikadu hodi troka bandeira ne’e ba fali bandeira nasionál Timor-Leste nian.
Orsida sei rejistu iha organizasaun telekomunikasaun nian, iha rekoñesimentu internasionál ita sei muda situasaun ida ne’e tanba durante ne’e ita hotu hatene katak sasan ita nian, ró ahi ita nian maibé uza hela simbolu nasionál rai seluk nian, entaun lójiku mak ne’e fizikamente sasan ne’e ita nian maibé administrativamente sasan ne’e ema seluk nian,” informa MTK José Agustinho.
Enkuantu troka bandeira signifika dehan fizikamente no administrativamente sasan ne’e pertense ba estadu Timor-Leste no sei loke dalan ba ró ahi hotu-hotu ne’ebé mak iha Timor-Leste hodi uza bandeira Timor Leste rasik tuir regra organizasaun marítima nasionál.
Jornalista : Juvita dos Santos
Editor : Agapito de Deus
