Lafaek News—Vise Ministru Interior (V-MI) Antonia Armindo, relata relasiona ho renovasaun estadu emerjensia ba dala XI (11) ne’ebé sei hahú funsiona iha loron 4 Marsu 2021, posibilidade atividade importasaun kontinua tama liu husi fronteira maibé tuir regulamentu ne’ebe governu sei deside iha loron EE funsiona.
“Sasan importasaun bele tama mai tuir regras hanesan bai-bain halo infesaun, troka kondutór no seluk tan maibé ita seidauk deside semana ida atu tama dala hira? tanba ne’e ohin ha’u ko’alia ona ho ministru interior hanesan mos primeiru ministru tanba nia mak tenke halo despaisu,” dehan V-MI Antonio ba jornalista iha Palasiu Governo Dili, tersa 02/03/2021.
Antonio relata, Ministériu Interior tau preokupasaun ne’ebé seguransa sira hasoru iha fronteira, tinan ne’e nafatin avansa ho postu 6, maibé la’os hadia dala ida de’it presiza mas sei tuir faze.
Maibé Ida ne’e la’os Ministeriu Interior mesak, ministeriu sira seluk mos Importante, tan ne’e ohin nia ko’alia ona ho ministra saúde atu distribui ekipamentus hanesan máskra no seluk tan ba seguransa sira iha fronteira.
Governante ne’e argumenta bainhira kontinua mosu movimentasaun iha fronteira la’os ekipa seguransa fronteira mak la forte, maibé ema ida-idak maka tenke iha konsiénsia oinsá bele prevene an husi covid-19..
“Tuir lei migrasaun artigu 147 hatete, ema ne’ebé tama ilegal sei selu koema minimu $.30 másimu $.250 ida ne’e agora la’o hela no ita halo tuir dekretu governu nian ne’ebé sita kona-ba lei migrasaun,”Nia afirma.
Entretantu tuir dadus ne’ebé Ministeriu Interior rejista ema tama ilegal husi fulan janeiru too fevereiru hamutuk 100 resin, no selu koima ba kofre estadu hamutuk $.700.
Jornalista : Orlando Magno
Editora : Nelya Barros
