Lafaek News— Governu liu hosi vise ministru Ministeriu Administrasaun Estatal (MAE) lansa fatuk dahuluk ba implementasaun projetu Uma Kbiit Laek (UKL) iha Minisípiu Aileu no komprometivu atu konstrui UKL hamutuk 99.
Diretór Jerál Dezenvolvimentu Rurál Rosito Guterres hatete, governu sei hari’i uma ba ema kbi’it laek hamutuk 99 iha munisípiu Aileu ne’ebé kompostu hosi postu administrativu lima mak hanesan Aileu Vila, Laulara, Liquidoe no Remesiu.
“Aileu Vila benefisiáriu hosi suku 12, uma ba kbi’it laek hamutuk 36. Laulara benefisiáriu hosi suku 6 uma ba kbi’it laek hamutuk 18, Postu Liquidoe benefisiáriu hosi suku uma ba ema kbi’it laek 7 hamtumuk 21 no ikus liu mak Remesiu benefisiáriu hosi suku 8 uma ba ema kbi’it laek hamutuk 24, total hamutuk 99,” informa Diretór Jerál Dezenvolvimentu Rurál Rosito Guterres hafoin lansamentu, kuarta (23/06/2021)
Diretór ne’e salenta prosesu konaba determina se mak atu sai benefisiariu ba UKL ne’e, prosesu mai hosi komunidade rasik, tanba sira mak identifika no verifika rasik benefisiariu nia kondisaun no sira rasik mak deside sé mak atu sai benefisiariu.
“Staff PNDS nia kna’ar iha prosesu ne’e mak fasilita komunidade hodi asegura katak prosesu sira la’o ho transparente no kualidade,” dehan nia
Nune’e ohin aktvidade UKL ne’e ofisialmente lansa hodi hatur fatuk dahuluk ba implementasaun uma kbi’it laek iha aldeia Bandeira Hun, suku Liurau, postu Aileu vila,munisípiu Aileu.
Aleinde lansa fatuk dahuluk sua exelencia vise Minustru MAE, sei inaugura projeitu konstrusaun sistema bee moos iha suku Liurai, no inaugurasaun rehabilitasaun sede suku Liurai no Lahae ne’ebé rehabilita tiha ona.
“Projetu Bee moos ne’ebé inaugura nudar projetu RKRE, ho orsamentu $29,177,32 no distansia hosi bee matan ba tanki rezervatoriu hamtutuk 2,1 km no torneira públiku, 7 benefisiariu ba bee moos ne’e komunidade suku Liurai rasik,” hakotu nia
Jornalista : Radio Rai Husar Abeka
Asisten Editor : Felisberto Fernades
