Lafaek News—Governu liuhosi reuniaun Konsellu Ministru (KM) deside hakotu serka sanitaria iha Munisípiu Bobonaro no Kovalima, nune’e kontinua renova iha Munisípiu Baucau no Dili.
Ministru Prezidensia Konsellu Ministru (MPKM), Fidelis Manuel Leite Magalhães hatete, Konsellu Ministrus aprova Projetu Rezolusaun Governu nian ne’ebé mantein impozisaun serka sanitária iha Munisípiu Baucau no Dili ba loron hitu tan.
Nune’e, bandu nafatin sirkulasaun ema sira nian entre munisípiu Baukau no Dili no sirkunskrisaun administrativa sira-seluk, eseptu iha kazu hirak ne’ebé nia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian.
“Konsellu Ministrus deside ona atu la renova impozisaun serka sanitária iha Munisípiu Bobonaru no Kovalima,”dehan MPKM Fidelis Manuel Leite Magalhães iha konferénsia imprensa, iha Palasiu Governu, kuarta (23/06/21).
Enkuantu, governu implementa serka sanitaria ba Munisipiu Dili no Baucau ba dala-7 nian hahú iha loron 14 fulan Juñu no termina ona iha loron ohin (23/06). Nune’e, kontinua extende serka sanitaria ba dala-18 hahú iha loron ohin (23/06) no termina iha loron 30 fulan-Juñu.
Jornalista : Juvita dos Santos
Asistente Editór : Felisberto Fernandes
