Lafaek News –Ministru Koordenadór Asuntu Ekonómikus (MKAE), Joaquim Amaral, afirma, stock foos iha armajen nakonu ne’ebé posivel atu estabiliza presu foos iha merkadu, maibé presu foos sa’e governu iha papel atu halo intervensaun.
“Ha’u hanoin governu iha kondisaun para estabiliza presu foos, ne’ebé ida ne’e laiha problema ho stock foos, ita iha stok armajen nakonu atu bele halo intervensaun iha periode ida ne’e,” dehan MKAE Joaquim Amaral, ba jornalista sira hafoin partisia iha reuniaun konsellu ministru, sesta, 08/01.
Ministru ne’e hateten, governu salva intervensaun hasa’e presu foos hodi estabiliza merkadu nasionál, see stock foos menus ona, governu iha kompeténsia hola desizaun.
“Ita halo hotu lai stok ne’ebé iha, depois maka ita hare’e nia evolusaun, se iha duni nesesidade hola desizaun, maibé ida ne’e setór privadu sira nia papel hodi halo sira nia funsaun atu sosa ho faan, entaun papel governu maka interven iha merkadu governu interven para labele foti tomak papel setór privadu sira,” nia informa.
Jornalista : Pedro de Almeida
Editora : Nelya Barros
