Lafaek News—Ministériu Koodenadór Asuntu Ekonómika (MKAE), Joaquim Amaral, hatete, governu no emprezáriu halo hela koordenasaun kona-ba distribuisaun programa sesta bázika ne’ebé finaliza sei tama ba prosesu pagamentu no hirak ne’ebé hotu ona merese atu halo pagamentu iha tempu oin.
“Prosesu distribuisaun sesta bázika nia laran, ita hein no enkoraza sira hodi prosesa ne’e bele la’o, ne’ebé ami servisu hela atu finaliza lalais prosesu ne’e iha fulan ida ne’e nia laran,” dehan MKAE, Joaquim Amaral, hafoin partisipa iha reuniaun konsellu ministru iha palasio governu, kuarta, (03/02/2021).
Governante ne’e esplika, programa distribuisaun ne’e sei remata iha fulan fevereiru to’o marsu, nune’e governu bele finaliza pagamentu ba kompania sira, tanba governu mós iha programa ba tinan 2021 nian.
“Sei remata iha fulan fevereiru to’o marsu nia laran, no mesmu iha difikuldade, maibé halo hotu lalais hodi prosesu pagamentu, tanba guverno sei iha programa ba 2021, ho ida ne’e enkoraja ba kompañia sira hodi hadia sira nia gestaun no inskrisaun lais liu tan,” nia esplika.
Nia informa, ministériu implementador sira halo koopera di’ak ho kompaiña bodi aselera prosesu distribuisaun no servisu intensivamente konserteza finansas iha hela prosesu finalizasaun ba pagamentu.
“Programa distribuisaun hotu, tanba ne’e kada kompaña ne’ebé maka hotu uluk nia bele hatama ninia relatoriu atu bele halo pagamentu, la’os hotu-hotu hanesan maibé ida ne’ebé maka hotu uluk bele halo pagamentu ona,” tenik nia.
Ministru fundamenta, distribuisaun ne’ebé la’o iha fulan kotuk bele halo pagamentu tuir finalizasaun ne’ebé maka iha no tuir prosesu ne’ebé mak la’o iha fulan kotuk nia laran.
Jornalista : Aniceto Dias
Asisten Editor : Pedro de Almeida
