Lafaek News—Vasina Astrazeneca rihun 20 ne’ebé apoiu husi governu Austrália to’o ona iha Aeroporto Internasionál Nicolau Lobato Timor-Leste, iha oras 12:00 ho aviaun marka Qantas, tuir planu sei apoiu tan rihun 10.
“Vasina AstraZeneca ne’e hamutuk rihun 20 to’o ohin, semana rua mai tan sei to’o tan rihun 10, apoiu ida ne’e hanesan komitmentu husi governo Austrália hodi tulun ba populasaun ho pursentu ualu nulu (80%), ne’ebé la kobre husi Covax,” dehan Embaixadór Austrália iha Timor-Leste, Peter Roberts iha sala VIP Nicolau Lobato, Kuarta, (05/05/2021).
Embaixadór ne’e hatutan, Vasina AstraZeneca ne’ebé apoiu ba Timor-leste ne’e produs husi Austrália iha ne’ebé povu Austráliano barak hetan ona vasina Astrazeneca ne’e.
“Vasina AstraZeneca ne’e produz husi Austrália no povu Austráliano mós hetan vasina ne’e ha’u hein atu simu Vasina AstraZeneca ne’e dahuluk husi doasaun ba lansamentu husi Ministra Saúde semana oin,” nia informa.
Nune’e mós nia dehan, governu Austrália liuhosi nia embaixadór iha Timor-Leste kontinua fornese dojen provizoriamente husi UNICEF to’o tinan 2021, ne’ebé kobre populasaun iha Timor-Leste tomak, tanba vasina maka dalan uniku.
“Ita hotu hatene Vasina mak hanesan dalan uniku hodi manan ba Covid-19, doasaun ida ne’e apoiu adisional ba fundu ne’ebé Governu Austrália liu husi WHO no UNICEF hodi implementa vacina COVID19,” tenik nia.
Alende ne’e mós nia relata, ohin tula Vasina Astrazeneca hodi mós ekipamatus fornesimentu mediku, rapid tes, rihun 5 hodi tulun laboratoriu nasionál husi sira nia Visilansia.
Iha parte seluk Ministra Saúde, Odete Maria Freitas Bello, hateten, vasina astraZeneca rihun 20 ne’e sei hare’e liu ba ema sira ne’ebé idade 60 no moras kronika.
“Ohin iha momentu ida ne’e ita simu tan vasina Astrazeneca ho doze rihun 20 ba moras infeksioza Covid-19 ne’ebé mak atu fó ba populasaun ho tinan 60 liu no mós ba sira ne’ebé ho moras kronika sira,” hatete Ministra.
Ministra mós hato’o agrdese ba apoiu tomak ne’ebé doador, ajensia sira no Organizaasaun non governmental nasionál no internasionál liu husi apoiu tomak ne’ebé mak iha tempu difisil nia laran Timor-leste hasoru.
Enkuantu simu Vasina Astrazeneca ne’e partisipa husi Ministra Saúde, representante UNICEF iha Timor-Leste, Embaixada Austrália iha Timor-Leste, Sames, Ministra Negósiu Estranjeiru no membru governo balun.
Jornalista : Rita Moniz
Asisten Editór : Pedro de Almeida
