Lafaek News—IX Governu Konstitusonal lilu husi Sekretariu Estadu Komunikasaun Sosiál (SEKOMS), Kinta, 20/02/2025, asina akordu ofisial ho média imprime 5, ba periodu datoluk nian kompostu husi jornal Dili Post, Jornal Diariu, Timor Post, STL no Independente, hodi halo distribuisaun jornal ba munisipiu 12 inklui RAEOA.
Sekretariu Estadu Komunikasaun Sosial (SEKOMS) Expedito Dias Ximenes, relata objetivu ohin SEKOMS asina ona kontratu ho média konvensional lima (5) iha área imprime nian, hanesan Dili Post, Jornal Diariu, Timor Post, STL nomós Independente, tanba programa ne’e rasik, mai husi IX Governu hahú husi tinan 2023-2024 no 2025.
“IX governu asina kontratu ona ho média konvensional lima (5) hodi halo distribuisaun jornal ba munisipiu sira, tanba ita iha orsamentu ne’ebé uituan iha 2024, ho nune’e ita deside katak média ida kada loron ita exemplar 180, ba média lima 5, ne’e iha munisípiu sira, iha tinan ne’e, ita halo redusaun uituan, tanba iha mós orsamentu ba iha distribuisaun jornal tun, maibé la’os jornal nia osan mak tun la’e, tanba negosiu diferensa iha osan uituan ho kontratu ida ohin ne’e, tanne’e, ita husu ba tékniku ho diretor sira iha fulan ida ne’e sira sei tur hamutuk hodi deskuti buka dalan oinsá atu hetan solusaun ba ida ne’e,” SEKOMS Expedito relata.
Iha biban ne’e goevrnante ne’e reafirma, bainhira média sira atu hatama envois ba governu, liuhusi ministériu finansas, iha regulamentu tenke hatama sedu, la’os atu taka ona mak foin hatama, tanba pagamentu ba kolega balu bainhira hatama jornal ka envois tarde, atu halo pagamentu la konsege selu iha tinan 2024, maibé nafatin selu iha tinan 2025, ne’e laiha problema governu nafatin selu.
“SEKOMS nafatin halo avaliasaun, atu nune’e haruka ekipa sira tun diretamente ba munisipiu sira iha munisípiu hotu, atu rona direta husi komunidade sira nia hanoin kona-ba jornal sira ne’ebé mak ita distribui ba munisípiu, maske ita hotu hatene katak mundu ohin loron avansadu tebes ho teknologia halo ema barak fokus liu ba sidade, tanba ne’e mak mai ho hanoin ida husi polítika IX governu nian oinsá ita lori jornal sira ba munisipiu, atu nune’e hakbesik ba komunidade sira hodi rona direita preokupasaun no aspirasaun komunidade nian”. Expedito Dias Ximenes, informa.
Entretantu Diretor média imprime Timor Post Jacob Ximenes, sublina nia parte agradese ba SEKOMS, liuhusi polítika IX governu, iha inisiativa no hanoin ne’ebé di’ak hodi tulun média sira, liu-liu média konvensional sira iha iha Timor-Leste.
“Ami asina kontratu ida ohin sai hanesan pasu importante ida ba média konvensional hotu, liu-liu ba média imprime 5 ne’ebé ohin asina nota entendimentu ho SEKOMS, atu nune’e ita lori jornal hakbesik ba komunidade sira iha teritoriu Timor-Leste hodi asesu informasaun sira iha ne’eba, tanba benefisiu ba komunidade sira oinsá haree ba importansia husi jornal atu bele asesu informasun ne’ebé di’ak, ida ne’e mak importante liu, la’os ho intensaun seluk hodi haree ba lukru ho diskusaun jornal, ida ne’e laiha vantajen ne’ebé di’ak ba média Profisional sira”. Jacob Ximenes, hakotu.
Tuir observasaun jornalista Lafaek News, iha seremonia asina kontratu ba média konvensional lima (5), hetan partisipasaun masimu husi Diretor média Dili Post, Diretor Timor Pos, Diretor STL, Diretor Independente, Diretor Jornal Diariu nomós Diretor GMN-TV.
Jornalista : Crispin de J. Amaral
Editor : Agapito de Deus
