Lafaek News—IX governu konstitusional liu husi Sekretariu estadu Komunikasaun Sosial (SEKOMS), kinta (08/02) ofisialmente asina kontratu servisu hamutuk ho media nasional 15 iha periodu daruak hosi fulan Fevereiru too Dezembru 2024.
Iha ámbitu asina kontratu ho media 15 ne’e, Sekretariu Estadu Komunikasaun Sosial, Expedito Dias Ximenes fundamenta, media hamutuk 15 kompostu husi imprime ho media online, mak asina kontratu ne’e tuir levantamentu avaliasaun media hirak ne’e tama ona iha kriteira perante sira nia ezisténsia.
“Sira seluk la’os la tama iha lista ne’e, maibé husi levantamentu avaliasaun husi SEKOMS katak media balun seidauk prienxe rekezitus ba saida maki ta atu halo iha akordu ne’e,” SEKOMS Exepedito Dias Ximenes haktuir.
Hodi dehan, media sira seluk ne’ebé seidauk asina akordu ne’e, ekipa SEKOMS kontinua hala’o levantamentu avaliasaun, no media 15 ne’ebé asina ona tanba tuir ona regras ne’ebé aplika iha SEKOMS.
“Tanba ne’e, kolega media sira seluk liu-liu Plataforma online dijital ekipa SEKOMS sei kontinua hala’o levantamentu avaliasaun, sira ne’ebé asina ona ho razaun prenxe ona regra iha SEKOMS,” Expedito akresenta.
iha okaziaun ne’e, Sekretariu Estadu Komunikasaun Sosial ne’e husu media sira hotu atu garante kualidade iha publikasaun loron-loron ho fontes ne’ebe balansu atu bele fo informasaun ba publiku ho kredibilidade no kualidade.
Iha sorin seluk, Diretor ezekutivu media Lafaek News reforsa, Agapito de Deus hatoo agradesimentu boot ba polítika IX governu konstitusional liu husi Sekretariu Estadu Komunikasaun Sosiál tau prioridade apoiu media privadu sira atu bele garante sustentabilidade hasa’e koñesimentu hodi kontribui ba dezenvolvimentu setor komunikasaun iha Timor Leste.
“Ha’u nia parte agradese ba SEKOMS bele konfia servisu hamutuk ho media privadu sira liu-liu media online dijital liu husi publisidade ohin ami asina ona kontratu ba tinan ida, ida ne’e sinál ida di’ak atu garante ezisténsia no bele motiva liu tan media sira iha aspeitu oi-oin, media sir abele kreativu halo produsaun pakote, no halo investigasaun klean ba problema social sira iha rai laran ho fontes ne’ebé kompleta atu distribui informasaun ne’ebé kredivel, feitu no balansu ba iha sosiedade,” Agapito de Deus sublina.
Observasaun Lafaek News, nota media 15 ne’ebé asina ona kontratu ho Sekretariu Estadu Komunikasaun Sosial (SEKOMS) mak hanesan, Dili Post, Lafaek News, GMN, Timor Post, Independent, Hatutan, Gardamor TV, STL Media Mudanca, LABEH, Media One Timor, SMNEWS, VIP TV no seluk tan.
Ekipa Kobertura : Lafaek News
