Lafaek News—Vizita Santu Padre mai Timor Leste, sei akontese iha fulan Agostu 2024, felizmente sei fo biban ba governu hodi prepara didi’ak infra-estrutura hodi bele akomoda Amu Papa nia vizita.
Asuntu ne’e, hatoo husi Primeiru Ministri IX Governu konstitusional Kay Rala Xanana Gusmão, ba jornalista sira hafoin reuniaun hafoin remata reuniaun Konsellu Superior Defeza no Seguransa, iha Palásiu Prezidensiál Bairo-Pité Díli.
“Mai iha fulan-Agostu ita sei iha tempu barak atu halo buat hotu ne’ebé komisaun tenke halo ida ne’e, liu-liu tanba ho idade tiha ona,” dehan Xanana Gusmão ba jornalista sira iha palasiu prezidensia Bairu-pité, kinta (08/02/2024)
Primeiru Ministru Kay Rala Xanana Gusmão konfirma, komisaun ida husi Vatikanu mai ona TL, halo diskusaun ho komisaun ne’ebé Governu forma hodi ko’alia kona-ba preparasaun sira ba simu vizita Santu Padre.
“Komisaun mai husi Vatikanu ko’alia ho komisaun ne’ebé forma husi Governu no hala’o dadauk ona sira nia servisu komisaun,” informa Xefe Governu Kay Rala Xanana Gusmão,
Tuir ajenda, Amu Papa nia vizita iha rejiaun Ázia Pasífiku, sei perkore nasaun haat, iha ne’ebé dahuluk sei vizita ba Papua Nova Guine, no tuir kedas TL, Singapura no Repúblika Indonézia.
“Amu Papa mai fatin haat kedas ba uluk Papua no mai Timor-Leste, husi ne’e ba husi Singapura mak ba Jakarta,” hakotu Xanana.
Asuntu ne’e seluk ne’ebe ko’alia iha reuniaun KSDS ne’e, Prezidente Repúblika José Ramos-Horta fó hanoin nafatin ba Governu atu atensaun maka’as ba asuntu seguransa, liu-liu kombate krime organizadu sira iha Timor-Leste.
Primeiru Ministru Kay Rala Xanana Gusmão informa, durante reuniaun Konsellu Superior Defeza no Seguransa, PR Ramos-Horta apresia ho maturidade joven sira nian, liu-liu Grupu Arte Marsiál no Arte Rituál, tanba kria armoni, paz no estabilidade iha rai-laran.
“Prezidnte fó prezu boot ida ba joven sira no responsável grupu arte marsiál sira ne’ebé depois hasai tiha desizaun suspende, komesa diminui no fó prezu boot tebes bainhira iha tempu natál to’o ano novu ho joven sira nia partisipasaun ho nune’e ho konsiensia tebes bele hanoin dadauk atu bele halo nusa mak hadia rai Timor-Leste,” dehan Kay Rala Xanana Gusmão.
Xefe Estadu mós fó hanoin ba Governu, kona-bá seguransa apresia hosi Ministériu, “membru sira fó hanoin dadauk ona no haree mós seguransa nasionál ninia kona-bá krimi organizadu hanesan money loandry, trafiku umanu, drogas, ne’ebé prezidente husu dehan ita hotu atensaun ba ida ne’e” haktuir Xanana.
Jornalista : Epifania I. Pinto
Editór : Agapito de Deus
