Gas Air Mata Ida Nakfera Iha Komunidade Nia Uma Oin

**Gas Gang nakfera rezulta labarik sira matan Manas no dada iis la di’ak.**

Lafaek News–Segunda (04/10/2021), tuku 5 :00 mosu gas gang ida nakfera iha edefisiu polísia eskuadra Nain-Feto Kintal Boot, rezulta komunidade no labarik sira matan manas no difisil dadas.

Tuir Izilda Maria da Silva haktuir kronolojia husi akontesimentu, iha tuku 5 :00 loraik segunda (04/10/2021), dasa hela uma oin no hateke ba kotuk derepente gas air mata ne’e suar no semo sai husi moru laran PNTL eskuadra Nain Feto, suar sai halo rezulta komunidade sira matan manas too bulelo.

Ha’u dasa hela rai, derepente ha’u haree buat ne’e semo mai ho suar maka’as, ha’u sente tahan labele, hau dada ha’u nia oan nain rua hodi halai ba subar iha uma sorin,’’ haktuir vítima Izilda Maria da Silva ba lafaek news iha fatin akontesimentu Kintal Boot, foin lalais ne’e.

Vítima ne’e haktuir katak akontesimentu ne’e la’os foin mosu ida ne’e, maibé iha tinan kotuk (2020), mós gas ne’e semo sai husi ne’e mai tarutu iha uma oin rezulta komunidade inklui membru PNTL iha eskuadra refere difisil dadas iis no matan loke la di’ak.

Gas air mata ne’e semo hakat liu moru polisia eskuadra Nain Feto nian fatin mak sai mai, hanesan ema mak soe sai mai tanba semo as mak sai mai, akontesimentu ne’e la’os foin dala ida ne’e, maibé iha tinan kotuk mos buat nakfera halo ami bulelu hotu inklui ema sira la’o iha dalan,’’ dehan Izilda

Izilda haktuir, hafoin gas air mata ne’e suar iha rai leten halo sira tauk no oin bulelo no kose Citra iha oin foin sente malirin, maibe kuaze minutu 40 nia laran ema hotu iha area ne’e dada is la diak no matan loke difisil.

Hau husu ba polísia eskuadra nain Feto atu kuidade sasan hirak ne’e iha fatin di’ak, tanba imi hela besik iha populasaun sira nia leet, see ohin granada ida mak nakfera karik ema barak bele lakon vida,’’ nia rekomenda.

Hatan ba preukupsaun ne’e, komandante Polísia Eskuadra Nain Feto, rekonese akontesimentu ne’e mosu iha tuku 5 lokraik ne’e, tanba gas gang ne’ebé membru polísia sira utiliza hodi halo auto-stop iha Xina Rate, membru polisia sira ne’e bainhira fila husi auto-stop ne’e too iha eskuadra tun husi motor ikus mai gas talin kait iha motor maka nakfera hodi semo sai ba tun iha komuniade ida nia uma oin.

Ohin ita nia membru polisia sira utiliza gas gang hodi halo auto-stop iha Xina-Rate nian, depois sira fila mai too iha skuadra no tun husi motor gas talin kait iha motor mak nakfera hodi semo sai ba suar iha komunidade ida nia uma oin,’’ komandante skuadra Nain Feto ne’e argumenta.

Komandante eskuadra Nain-Feto fundamenta, nia membru polísia sira buka tuir hela gas gang semo ba ne’ebé? Maibé afinal semo tun loos iha komunidade ida nia uma oin hodi kauza labarik sira dada iis no loke matan la di’ak hotu.

Iha akontesimentu ne’e ami simu kedan reklamasaun husi komunidade sira, tanba ami mos buka hela buat ne’e iha ami nia fatin, ternyata gas gang ne’e semo liu moru hodi nakfera iha komunidade ida nia uma oin,’’ dehan nia.

Komandante eskuadra ne’e mos honestu katak akontesimentu ida iha tinan kotuk ne’e nia ladun hatene, tanba foin hala’o servisu nu’udar komandante eskuadra Nain Feto iha tinan ne’e, tanba ne’e husu komunidade sira labele pániku tanba akontesimentu ne’e la’os finzidu maibé ne’e derrepente de’it mak mosu hanesan ne’e.