Lafaek News–Fundasaun Hadomi Timor, realiza atividade workshop ne’ebe hetan apoiu hosi Timor Plaza hodi organiza orador hosi komunidade konten kreator sira hodi fahe hanoin no motiva komunidade konten kreator kontinua sira nia kreatividade hodi kombate hoax no eduka foin sa’e sira uza media sosial tuir dalan loos.
Iha okaziaun ne’e Diretor Fundasaun Hadomi Timor Nicho Linux afirma esplika objetivu hala’o talkshow ne’e atu motiva no enkoraza foin sa’e sira hosi content kreator ne’ebe Timor-oan rasik produs hanesan Ari Bargon, Deniza Martins, Jony Barto no seluk tan kona-ba dezafius no oportunidade ne’ebe sira hasoru iha momentu kria kontent.
“Objetivu hosi workshop ne’e atu enkoraza foin sae Timor oan liu hosi Content ne’ebé maluk sira halo hanesan Ari Bargon, Venisia Martins, Jhony Barto, Dhermo halo tanba sira iha koñesimentu tinan barak ona, tanba ne’e sira presija fahe sira nia esperiensia ba foin sai sira kona-ba dezafius saida mak sira hetan no oportunidade saida mak sira hetan iha prosesu halo Kontent,” Diretor FHT Nicho Linux ba jornalista sira iha Timor plaza, domingu (06/04/2025)
Nicho Linux haktuir atu desenvolve kontent kreator lokal iha Timor Leste, ne’ebe di’ak liu nia parte husu ba kontent kreator foin sa’e sira atu partisipa másimu iha kontent hirak ne’ebe sira prodúz nune’e bele hariku kontent lokál iha Timor Leste ba mundu.
Tempu hanesan reprezentante kontent kreator Timor Leste, Jhony Barto hateten atu sai kontent kreator ne’ebe koñesidu iha Youtube, Facebook, ho tiktok, la’os fasil, maibé tenke enfrenta dezafius oin-oin hanesan krítika hosi netizen sira maibé labele tau kestaun tanba liu hosi krítika sira ne’e bele motiva di’ak liután iha futuru
“Wainhira Ita atu sai kontent kreator ne’ebé koñesidu iha media sosial (MedSos) hanesan youtube, facebook no tiktok ba ha’u la fasil sempre hasoru dezafius oi-oin liu-liu kona-ba krítika sira hosi netizen maibé ida ne’e la’os kestaun, tanba krítika sira bele motiva ita hodi halo kontente ne’ebé diak ba oin,” afirma Jhony Barto,
Ikus liu, Assosiasaun Konten Kreatór Timor Leste kompromete sei kontinua ativu iha kontent kreativu lokal hanesan, edukasaun, turizmu, agrikultura no kulinária.
Jornalista : Maria José/Natalino Lopez
Editor : Agapito de Deus
