LafaekNews-Diretóra Jerál Prestasaun Servisu Saúde, (DJPSS) Odete da Silva Viegas, hateten, iha fulan Outubro ho Novembru 2021, vasina ho tipu astraZeneca ho Sinovax sei expair, Ministériu Saúde (MS) hahú buka estratéjia foun ne’ebé efetivu no sei ‘obriga’ populasaun hodi bele partisipa iha vasina
Tuir, Odete da Silva Viegas, hateten, Planu implementasaun vasina ne’ebé mak hala’o tiha ona iha territóriu tomak, hahú kedas iha fulan Abríl no ohin halo avaliasaun nasionál ida ne’e munisípiu hotu-hotu partisipa ho objetivu atu haree progressu husi vasina no implementasaun husi vasina ne’e rasik.
“Ita haree mós dezafius saida mak sai obstaklú ba iha implementadores sira iha baze liu-liu diretór sira iha Munisípiu no atu haree mós númeru vasina boot to’o iha ita-nia rai no mós sei espira iha tempu badak, balun sei espira iha 31 Outubru, balun iha 10 Novembru í balun iha 31 Novembru ho hanoin sira ne’e mak ita bolu hamutuk atu oinsá muda fali ita-nia estratéjia karik demanda ita-nia populasaun ladun partisipa ativu iha vasina,”dehan nia iha Hotel Novo Turismu Lecidere, tersa (21/09/2021).
Odete husu , ba diretór saúde sira nune’e ba munisípiu hahú aban sira tenke hahú haree ona mekanismu implementasaun ida ne’ebé maka mais efetivu bele responde ba nesesidade populasaun sira nian.
“Hanesan Ezemplu ha’u fó de’it katak, karik durante ne’e ita halo de’it, ou loke postu vasinasaun iha sentru saúde, no mós iha suku, aldeia maibé ita presiza haree ona katak, karik populasaun la hakbesik saida maka profesional saúde sira tenke halo, sira tenke tama sai mós uma oinsá halo vasina ba iha ita-nia komunidade maibé ne’e la’ós servisu mesak tenke servisu mós ho autoridade lokais sira”, hakotu nia.
Diretóra ne’e hatutan, dadaun ne’e númeru Vasina aas liu mak iha Dili, tuir RAEOA, Kovalima ho Vikeke, maibé númeru vasina ne’ebé kiik liu mak iha Munisípiu Ermera.
Jornalista : Sandi Belo
Asisten Editór :Egidio Nono
