LafaekNews-Governu liu husi reuniaun Konsellu Ministru (KM), deside hakotu ona Serka Sanitária(SS) iha Covalima, Baucau no Ermera, no  Munisípiu Dili estende to’o loron 29 fulan-setembru

Ministru Prezidénsia no Konsellu Ministru (MPKM), Fidelis Manuel Leite Magalhães hateten, governu aprova projetu Rezolusaun Governu nian ne’ebé mantein impozisaun serka sanitária iha munisípiu Dili to’o tuku 23:59  loron 29 fulan-setembru.

“Governu aprova projetu Rezolusaun Governu nian ne’ebé mantein impozisaun serka sanitária iha munisípiu Dili to’o tuku 23:59  loron 29 fulan-setembru no hakotu impozisaun serka sanitária iha munisípiu Baukau, Ermera no Kovalima, ne’ebé remata ohin iha tuku 23:59,” dehan Fidelis hafoin remata enkontru KM iha Palasíu Governu Dili, kuarta-feira (22/09/21).

Nune’e, mantein impozisaun proibisaun sirkulasaun ema sira-nian entre munisípiu Dili no sirkunskrisaun administrativa sira-seluk, exetu iha kazu hirak ne’ebé iha fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian, La inklui iha proibisaun ba sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 ne’ebé akompaña ema sira ne’e,dehan Fidelis.

Jornalista        : Juvita dos Santos

Asisten Editór: Egidio Nono