LafaekNews-Governu hahú halo ona preparasaun ba implementasaun vasina ho tipu Pfizer ba foinsa’e ho idade husi tinan 12 to’o 17 iha territóriu nasionál
Ministru Prezidénsia no Konsellu Ministru (MPKM), Fidelis Leite Magalhães hateten, responsavel sira husi Elaborasaun no Koordenasaun Ezekusaun Planu Vasinasaun kontra COVID-19 halo ona mós aprezentasaun ida kona-ba preparasaun implementasaun vasina Pfizer nian iha territóriu nasionál, ne’ebé hodi permite vasinasaun foin-sa’e sira ho idade husi tinan 12 to’o 17
“Mekanizmu COVAX konfirma ona disponibilidade hodi haruka doze 100.620, ne’ebé sei to’o iha país iha tempu badak laran,” dehan Fidelis hafoin remata enkontru KM iha Palasio Governu Dili, kuarta (22/09/21).
Governante ne’e akresenta, tuir planu ne’ebé aprezenta vasinasaun ne’e sei realiza iha eskola sira no alunu foin-sa’e rihun 50 sira husi 6 to’o 11 liseu, husi munisípiu pre-selesionadu sira, máka sei simu vasina ba dahuluk.
“Iha faze daruak nian sei vasina alunu sira seluk no ba foinsa’e sira ne’ebé la rejista iha eskola sira,” informa Fidelis.
Enkuantu doze daruak husi vasina ne’e nian sei administra ho intervalu loron 21, Preparasaun ba kondisaun nesesária armazenamentu vasina nian sei realiza iha SAMES ho apoiu tékniku no finanseiru UNICEF nian, Prepara ona prosedimentu operasionál sira, ba armazenamentu, transporte, jestaun no aplikasaun vasina nian, ne’ebé sei asegura ho apoiu tékniku husi Organizasaun Mundiál Saúde nian Vasina Pfizer kontra COVID-19 ne’e iha efikásia 95% kontra infesaun sintomátika SARS-CoV-2 nian. Hakotu Fidelis.
Jornalista : Juvita dos Santos
Asisten Editór: Egidio Nono
