Lafaek News-Diretór Saúde Munisípiu Ermera, Antonio de Fátima informa númeru vasinasaun iha munisípiu Ermera kiik liu, foin atinje 22.440, tanba komunidade la ba vasina tan antes ne’e governu deklara katak vasina laiha obrigatóriu.
Vasina iha Ermera dadaun ne’e populasaun sira ho idade 18 ba leten ne’ebé tenki ba fó vasina ne’e mak iha 75.124, agora ita foin atinje 22.440, agora ita esforsu nafatin ba oin kria tan estratejia foun balu, no servisu hamutuk ho lider komunitariu sira, NGO no instituisaun relevantes sira para ita halo nafatin esforsu para bele atinje metas ne’ebé iha,” esplika Diretór Saúde Munisípiu Ermera, Antonio de Fátima iha Novu Turizmu, tersa (21/09/2021)
Vasinasaun primeira doze atinje ona 9.7% no ba iha segundo doze atinze ona 29.7% , ida ne’e signifika Ermera seidauk atinje metas ne’ebé iha, dezafius ne’ebé sira hasoru mak komunidade sira tauk atu ba simu vasina, no sira lakohi ba vasina ho razaun antes ne’e governu fó sai ona vasina la’os obrigatoriu.
Dezafius ne’ebé ami hasoru mak; primeiru Komunidade tauk, segundu antes ne’e governu dehan vasina ne’e laos obrigatoriu, terseiru mobilizasaun lideransa komunitariu sira atu lori povu mai iha postu vasinasaun ne’e menus, no nai ulun sira halo hela deklarasaun polítika balu ne’ebé fó hela influénsia, no ikus liu mak iha Ermera parokia balu seidauk apoiu ami,” dehan nia
Nune’e nia hatutan, durante ne’e sira halo hela kampania vasinasaun ba komunidade sira iha aldeia, no sira halo mós kampania dor to dor, maibé sira nafatin hasoru problema.
Jornalista : Sandi Belo
Editór : Agapito de Deus
