Lafaek News- Iha fulan Novembru moras infeksaun respiratóriu (IR/ISPA) kontinua domina iha Sentru Saúde Bekora (SSB) ho total pasiente Rihun Ida Atus Lima Resin.
“Moras ne’ebé mak sentru saúde ne’e rejistu aas liu iha fulan Novembru mak moras ISPA, ho total pasiente hamutuk 1,584,” Xefe Sentru Saúde Bekora, Adelina Pinto, ba LafaekNews iha ninia knaar fatin, kuarta semana ne’e.
Hatutan nia, mezmu sentru saúde refere rejistu moras ne’e númeru aas maibé la fó ameasa ba ema ida nia vida.
“Moras ISPA ne’e rejistu ho numeru ne’ebe mak aas liu iha sentru ne’e, maibé pasiente la iha ema balu mak lakon nia vida, ami haree pasiente ne’ebé mak moras grave, ami transfere kedas ba Ospitál Nasionál,” nia subliña
Informa nia, alende rejistu moras ISPA ho númeru bo’ot iha sentru refere, rejista mós moras seluk inklui asidente tráfiku.
“Iha ne’e ami rejistu mós moras diarea hamutuk 276, pneumonia hamutuk 95, no mós asidente trafiku hamutuk 58,” dehan nia.
Entretantu antes termina dada lia ho jornalista LafaekNews, xefe sentru ne’e mós informa katak, problema seluk ne’ebé daudaun ne’e sentru enfrenta maka menus ba ekipamentu hodi apoiu servisu.
“Kama (ema moras toba) iha ne’e komesa tinan 2012 nian, ne’ebé agora kama sira ne’e aat hotu ona. Problema ne’e ami hato’o bebeik ona ba iha ministériu saúde maibé to’o oras ne’e seidauk iha resposta ba ami,” hakotu nia
Jornalista : Sandi Belo
Editór : Ezequias Tomás
