Venilale-(Lafaek News)–Fuan la hakmatek laran dodok hamosu matan sulin nei-neik husi matan habokon hasan too maran hateke didin lo-loon hirak be kuak burus husi uma laran ba liur, ai-rin sira hamrik la metin bainhira vilosidade anin maka’as soke iha uma lo-loon nakdoko halo krabat no hadak sira lian hanesan besi kusan sira kose malu.
Moris tomak nakonu de’it ho triste bainhira laiha ona forsa atu hala’o servisu ne’ebé todan, tuur hanoin ho lian lakon hare’e ba kondisaun uma dodok bei-beik ameasa boot liu iha tempu udan no anin boot.
Moris iha mundu ne’e maromak haraik moris ida la hanesan ema balun moris tenke terus ba aihan lor-loron, laiha hela fatin ida be dignu, ema balun riku too haluha an no haluha nia maluk sira be moris iha mukit laran, maske haree hela ho matan, maski rona hela husi tilun, finze rona hanesan la rona, finze haree hanesan la haree.
Situasaun mukit ba Abel Varela moris iha 12/07/1945, aldeia Osso-Gori, suku Uatu Haco, postu adminitrativu Venilale, munisípiu Baucau, ho nia kaben Juleta Varela (Matebian), hela iha uma barraka ida be inkondional, halis hadak didin sira fohuk no kalen iha uma kakuluk sira frozen halo udan sulin husi kuak kiik sira be iha kalen laran monu burus ba uma laran book an be la di’ak, laiha eletrisidade ida halakan iha oras kalan, sunu de’it ahi matan tein nian hodi halo naroman iha kalan.
Avo konta ho oin triste, bainhira nia kaben Juleta Varela sei iha nia sorin buat hotu bele rezolvidu tanba iha forsa atu konstrusaun uma simples ida ne’ebé dadaun ne’e nia kaben hela ba, inklui buka moris liu husi fan produtu lokal hodi responde ba nessesidade uma laran, maibé iha tinan 2011 nia kaben hakotu is, avo Abel enfrenta problema oin-oin liliu uma, tanba laiha ona kbi’it no forsa atu tesi ai hodi hari’i uma.
“Ha’u ba buka ai atu tesi hadia uma, mas forsa laiha, uluk sei forsa hamutuk ho ha’u nia kaben halo servisu ne’e kama’an, ha’u nia fen mate tiha hela ha’u mesak kbi’it lato’o, tan ne’e seidauk hadia fali, uma ne’e kleur ona kuandu tempu udan bee tama de’it kalen sira tohar ne’e anin maka sobu,” dehan Avo Abel Varela ba lafaek news iha nia rezidensia Osso-Gori foin lalais ne’e.
Uma ne’ebé Avo Abel hela ba luan metro 4 no naruk metru 6 taka ho kalen frujen didin ho au-betu hahu monu, kuartu rua ida ba toba fatin no ida rai sasán iha laran inklui sala ida hodi tein no han nian, hare’e hadak ne’ebé toba halo ho au betun ne’ebé klot no haleu ho roupa, iha sala visita ahi matan mós iha laran inklui material sira seluk.
“Ha’u tein iha laran de’it tanba dapur laiha, sasán seluk maka rai sabarut hela ne’e, hanoin atu ba hili nu’u tahan hodi halo dapur kiik ida hodi tein, mas ita mesak se maka ba tesi tan ai hodi halo,” nia informa.
Bainhira dada lia ho avo Abel iha uma laran matan fihir ba didin haleu uma ne’e komesa monu no balun dodok, hateke sa’e ba uma kakuluk borus to’o lalehan no balun loke an, susar tebes atu hadiah no prega metin nune’e tahan ho de’it au betun no fatuk iha uma leten hodi hanehan netik kalen ne’ebé nakloke an ona.
“Kalen dodok ona, balun anin hu’u lakon tiha ida hela ne’e maka ha’u hanean fatuk ho ahi iha leten para anin mai labele sobu, ha’u nia kalen uituan hola ona maibé se maka atu hadia, ha’u mesak labele tanba ita idade ona,” dehan nia.
Maske ho uma simples ne’e avo Abel mós la lakon photografia atual primeiru minstru TAUR MATAN RUAK nian ne’ebé taka iha didin lolon hodi hatudu katak domin boot nafatin ba nia lider istoriku sira.
Avo Abel mós la tane liman ba ema ida tanba iha toos rasik hodi kuda produtu lokal sira, bainhira osan laiha obrigadu tenke lori produtu ne’e ba merkadu fan ka troka ho masin midar, kafe, masako inklui foos hodi sustenta nesesidade loro-loron.
“Osan treseira idade ha’u hetan, maibé ita presija buka moris liu husi fan produtu ne’ebé ita kuda, se la fan maka ita soe estraga de’it, tan ne’e ha’u tenki fan hodi hatan netik ba ita nia kabun,” hateten Avo Abel.
Iha vizita jornalista lafaek news ne’e, avó Abel hatoo gradese wain tanba bele buka hatene povu kiik sira nia moris iha area remotas iha era independénsia ida ne’e.
Observsaun lafaek news iha terrenu nota katak Avo Abel presija duni tulun hodi konstrui uma ne’ebé nia hela ba, kondisaun uma refere at ba da-daun bainhira tempu udan no anin boot sei risku tebes vida avo Abel nian.
Jornalista : Pedro de Almeida
Editora : Nelya Barros
