Lafaek News—Forum Organizasaun Noun-Governamental Timor Leste (FONGTIL) konsidera ezisténsia Polísia Siéntifika Investigasaun Kriminal (PSIK) hamósu konflitu ho Polísia Nasionál Timor-Leste (PNTL) iha ezekusaun servisu seguransa Interna iha rai laran.
“Bazeia ba ami nia observasaun nota katak, ezisténsia PSIK hamósu konflitu de interese entre PSIK ho PNTL iha ezekusaun servisu seguransa interna,” dehan Kordenadór Advokasia Ivo Colimau Lay Costa, ba jornalista sira liu husi kompriensa imprensa iha Kaikoli, kuarta, (1/07/2021).
Nia hatutan iha artigu 6 husi lei Orgánika PSIK hatudu kuaze apodera kompeténsia servisu PNTL nian, ne’ebé impoen iha artigu 2-3 husi lei Orgánika PNTL Nu.9/2009,de 18 Febreiru.
Ho ida ne’e FONGTIL husu orgaun executivu/ Konsellu Ministru no orgaun lejislativu-komisaun B ne’ebé trata asuntu Defeza Seguransa no Negósiu Estranjeiru, presiza hadia situasaun atual ne’ebé iha, liu-liu ezisténsia no papel PSIK iha país ida ne’e.
“Halo revogasaun ba mandatu PSIK ne’ebé vigora iha dekretu lei nu.15/2014, de 14 maiu. dizolve PSIK nudar instituisaun polísia ne’ebé iha autoridade Ministériu justisa, no konverte PSIK ba Unidade Siéntifika Investigasaun Kriminal ne’ebé abreviado UCIC,” nia informa.
Koordenadór mós rekomenda, inkaixa UCIC ba iha Autoridade Polisia Nasionál Timor-Leste (PNTL), espesialmente iha estrutura Polísia Nasionál Servisu Investigasaun Kriminal (PNSIC).
“Objetivu atu fasilita Investigasaun Sientifika Kriminal, hodi apoiu orgaun ou instituisaun juridiku seluk, ne’ebé iha papel halo investigasaun hanesan, ministériu públiku, KAK, Forensik no mós HNGV ho kordenasaun husi PNTL,” hatete nia.
Estajiáriu : Etelvina Sarmento
Asisten Editór : Pedro de Almeida
